Innarluuteqartut amerlanerusut Tiliumut saaffiginnittartut
Innuttaasut Tiliormut 2020-mi saaffiginnittut 2019-imut saaffiginnittunit amerlanerupput. Saaffiginnittut affaasa missaat tassaapput innuttaasut innarluuteqartut.
Innuttaasut 249-it Tiliumut 2020-mi saaffiginnissimapput. Innuttaasut 2019-imiit amerlanerusut taamaasillutik saaffiginnissimapput, 2019-imi 209-t saaffiginninnikuummata.
Tilioq ukiumut nalunaarutimini, sapaatip akunnerani matumani saqqummersumi taama ilisimatitsivoq.
Saaffiginnittut affangataa tassaapput inuit innarluutillit Tiliumit siunnersorneqarnissamik kissaateqartut. Saaffiginnittut sinneri tassaapput qanigisaasut, sullissisut politikerilluunniit.
2020-mi saaffiginnittut kisitsisinngorlugit:
- Inuit innarluutillit 123-t.
- Qanigisaasut 94-it.
- 28-t tassaapput sullissisut, susassaqartut, ineqarfinni affarliit ilinniartitsisulluunniit ernumassuteqartut, ilinniartut, innuttaasut paasisaqarusuttut politikerillu.
- Saaffiginissutit affangajaat taamaalillutik innuttaasunit innarluutilinnit saaffiginnissutaapput. Taakku ukiup siulianit amerleriarput, tassani inunnut innarluutilinnut qanigisaasut saaffiginnittut amerlanerupput, Tilioq ukiumoortumik nalunaarutimini inerniliivoq.
Avannaanit amerlanerit
Saaffiginnissutinit 234-init naatsorsuinerit takutippaat saaffiginnissutit amerlanersaat Avannaata Kommunianeersut. Saaffiginninnerit oqarasuaatikkut, mailikkut ornigulluniluunniit saaffiginninnerupput.
Tilioq ukiumoortumik nalunaarutimini nassuiaavoq Tilioq Qaanaamut 2020-mi angalanerani innuttaasut arlallit saaffiginninneri naatsorsuutinut ilaammata kommunimit tassannga saaffiginnittut amerlanerusut. Tilioq Qaanaamut angalammat innuttaasut 47-t ornigullutik saaffiginnissimasut, Tilioq angalanermit nalunaarusiaani atuarneqarsinnaavoq.
Saaffiginnittut 15-it naatsorsuutini ilaatinneqanngillat, Tiliumut saaffiginnikkamik suminngaanneerfimminnik taasaqarsimanngimmata.
Saaffiginnittut uku pillugit saaffiginnikkajupput:
Tapersiissutit atortullu ikiuutit.
Sulianik suliarinninnerit.
Siusinaartumik soraarnerussutisiat.
Peqqinnissaqarfik.
- Saaffiginnissutini suna pineqartarnersoq ersarissumik assigiissuteqarpoq. Tamassuma ilimanarsisippaa ajornartorsiutit assigiissutaasut kommuni, Naalakkersuisuni aamma Kalaallit Nunaanni innuttaasuni pissutsinik pissuteqartut, Tilioq inerniliussaqarpoq.