Innarluutillit sapaatip akunnerannut atatillugu Tilioq nalunaarusiamik saqqummersitsivoq
Tiliup innarluutillit sapaatip akunneqartinneqarnerat Nuummi aaqqissuussilluni malunnartinniarpaa, aammalu politikerinut aamma susassaqartunut inuit innarluutillit atugaannik pitsannguinermut ikiuisinnaasunut aaqqiissutissatut siunnersuut saqqummersinneqarpoq.
Tilioq innuttaasunut tamanut aaqqissuussamut isumassarsiorfiusinnaasumut peqataanissamut qaaqqusivoq, tassani Innarluutillit sapaatip akunnerat ”Qanoq iliornissamut nukissaq” qulequtaralugu” malunnartinneqassaaq.
Aaqqissuussaq Nuummi Katersortarfimmi pissaaq, tassani Tiliup saqqummersitaa ”Takorluukkat piviusunngorsinnaapput” saqqummiunneqassaaq.
Saqqummersitaq Tiliup ataatsimeersuarneranit ”Inuk qitiutillugu”-mit anguneqarpoq, taanna maajimi 2023-mi ingerlanneqarpoq, tassani politikerit, inuit innarluutillit, ilaqutaasut, atorfilittat aamma peqatigiiffiit soqutigisaqartut, inuit innarluutillit ataasiakkaat takorluukkaminnik malersuisinnaanerannut qanoq tapersersuisoqarsinnaanera pillugu aporfiillu piiaarnissaat pillugit oqallittoqarpoq.
Saqqummersitami inuiaqatigiinni inunnut innarluutilinnut peqataatitsinermut aamma isumaginninnermut tunngatillugu ilungersuussassanut tunngatillugu, Tilioq aaqqiissutissatut siunnersuuteqarpoq.
Innarluutillit oqaaseqartartuat Nuummi naapiguk
Aaqqissuussaq 11. oktober 2023 nal. 12-15 Nuummi pissaaq. Katersortarfimmi oqalugiartoqassaaq, aamma innarluutillit peqatigiiffiinit assigiinngitsunit aallartitat naapinnissaannut periarfissaqarpoq.
Tassani innarluutillit oqaaseqartartuat kiisalu Tiliumi innuttaasunut siunnersorti oqaloqatigineqarsinnaapput. Tassanilu aamma Tiliup innuttaasunut siunnersuineranut piffissamik isumaqatigiissusiortoqarsinnaavoq, taanna Nuummi sisamanngornermi 12. oktober 2023 pissaaq.
Innarluutillit sapaatip akunnerat, sapaatip akunnerani 41-mi pisoq, inuiaqatigiittut qanoq ililluta inuit innarluutillit pillugit suleqatigiinnikkut aporfiiaasinnaanitta aamma iliuuseqarsinnaanitta nukittorsernissaa nalliuttorsiutigalugulu eqqarsaatersuutiginissaanut piffissanngussasoq, Naalakkersuisut nittartakkaminni allapput. Innarluutillit ukiumoortumik sapaatip akunnerat misilittakkanik, isumassarsianik aamma oqaluttuanik avitseqatigiinnissamut periarfissiivoq, tassani qanoq iliorluta ataatsimut nunarsuaq tamanut peqataatitsiffiunerulersinnaanissaannut aamma ornikkuminarnerulersinnaanissaanut pilersitseqatigiissuugut.
Aaqqissuussat nakkutigikkit
Aaqqissuussat arlallit nunatsinni tamani innarluutilinnut sapaatip akunneqartitsinermi ingerlanneqassapput. Aaqqissuussat tassaasinnaapput workshoppertitsinerit, kulturikkut pikialaartitsinerit imaluunniit inunnik katerititsinerit immitsinnut ilinniarnissatsinnut isumassarsiorfiginissatsinnullu periarfissiisut.
Tiliup aamma Isumaginninnermik Aqutsisoqarfiup kikkut tamaasa innarluutillit sapaatip akunnerannut atatillugu aaqqissuussarpassuarnut pisussanut peqataasarnissaannik kaammattorpaat. Aporfiiaanermi aamma iliuuseqarsinnaanerulernermi inuttut misilittakkat pillugit tusarfiginnikkusupput. Oqaluttuassarnik aamma isumassarsiarnik Isumaginninnermik Aqutsisoqarfimmut ugguuna avitseqatigitigut: iass@nanoq.gl, taamaalilluta peqatigiilluta siunisaq peqataatitsinerusoq ornissinnaaniassagatsigu.