Innuttaasunik ataatsimiisitsinerit: Ilinniartitaaneq, suliffissat, inissiat atornerluinermullu akiuiniarnerit oqaluuserineqartut
Folketingimit Kalaallit Nunaat pillugu ataatsimiititaliaq Tasiilamiinnermini innuttaasunik ataatsimiisitsimmat inissianik sanaartortoqarnissaanik pisariaqartitsineq, suliffissaqartitsiniarneq Tasiilamilu inuusuttunik ilinniaqqiffissanik pisariaqartitsineq oqaluuserineqarput.
Folketingimi Kalaallit Nunaat pillugu ataatsimiititaliaq ukiumut ataasiarluni ukiorluunniit ataaseq allortarlugu paasisassarsiorluni angalasinnaasarpoq. Ataatsimiititaliaq aalajangerpoq ukioq manna Tunumut angalassalluni, innuttaasut isumaannik paasiniaalluni.
Tasiilami innuttaasut marlunngornermi 23. august ataatsimiisinneqarmata innuttaasut 25-it missaat peqataapput. Inissianik sanaartortoqarnissaanik pisariaqartitsineq, suliffissaqarniarneq Tasiilamilu inuusuttut ilinniaqqiffigisinnaasaannik pisariaqartitsineq ataatsimiinnermi oqaluuserineqarput.
Kalaallit Nunaat pillugu ataatsimiititaliaq tunumi tikeraareernermini tusagassiorfinnut nalunaaruteqarluni taama allappoq.
Nioqqutissanik tikisitsisarnerup akulikinnerunissaa Tasiilallu eqqaani angallatit nakkutigineqarnerunissaat aamma kissaatigineqartoq oqaatigineqarpoq.
Oqartussat eqqortut ilisimatinneqassasut
Tasiilami innuttaasunik ataatsimiisitsinermi taaneqartut arlallit Folketingimit toqqaannartumik iliuuseqarfigineqarsinnaanngillat. Ataatsimiititalialli siulittaasuata Aaja Chemnitzip oqaatigaa innuttaasut oqaatigisimasaat oqartussanut eqqortunut ingerlateqqinneqassasut.
- Oqaloqatigiinneq paasisaqarnerlu innuttaasunit tunniunneqartut ataatsimiititaliap silatusaarneq atorlugu aaliangiinissaannut iluaqutaasinnaapput. Tasiilami Kuummiunilu sungiusimavaat arlallit inerniliissusserusullutik tikittartut. Tamanna uagut ataatsimiititaliami suleriuserinngilarput. Akisussaaffigisagut pitsanngorsarusuppagut, soorlu politiit, isertitsiviit eqqartuussiveqarnerlu, taamatullu oqartussat sumiiffinniittut oqaloqatigerusullugit, ataatsimiititaliami siulittaasiq Aaja Chemnitz oqarpoq.
Taassuma nuannaarutigalugu oqaatigaa Folketingimit aningaasaliiffigineqarsimasut Tasiilami maanna sunniuteqarnialermata, tassa politiit nutaamik angallatitaarnerat Tasiilami meeqqallu illussaannik toqqissisimaffissamik aamma meeqqanut kinguaassiutitigut atornerlunneqarsimasunut videukkut apersuiffiusinnaasutut suliaqartoqarnera.
Nuummi Katuami innuttaasut pingasunngornermi 24. august ataatsimiisinneqarmata innuttaasut 30-t missaat peqataapput. Meeqqat kinguaassiuutitigut atornerlunneqartarnerinut akiunissamut suliniutit kissaatigineqartut, tassani paasineqarpoq.