Sermersooq
Innuttaasunut amerlasuunut angalanissamut tapiissutinik agguaassivoq
Kommuneqarfik Sermersuup angalanissamut aningaasaateqarfia ukioq manna innuttaasut ilaqutariillu 50-it nuannaajallaatissaminnik angalanissamut tapiissutisissapput. Illuanik inuit 100-t sinneqartut qinnuteqarsimapput
Ukiut tamaasa Kommuneqarfik Sermersooq angalanissamut aningaasaatinit agguaasarpoq, ukioq mannalu aningaasaliissutit kommunimi innuttaasunut agguagassat 500.000 koruuninik ilaneqarsimapput.
Illuanilli aamma aningaasat pilerngunneqarput. Qinnuteqartut katillugit 115-iupput taakkulu angalanissaat katillugit 1,7 millioner koruuninik naleqassaaq, Kommuneqarfik Sermersooq ilisimatitsivoq.
Qinnuteqartut taama amerlatigitillugit angalanissamut aningaasaateqarfimmi siulersuisut sukannersumik tulleriiaarisariaqarsimapput.
Ilaqutariit meerartallit
- Siulersuisut pingaartissimavaat ilaqutariit meerartallit isertitakinnerusut. Qinnuteqartunittaaq tulleriiaarinitsinni aamma pingaartissimavarput ukiut kingulliit tallimani angalasimanngitsut, Charlotte Ludvigsen (IA), tusagassiuutinut nalunaarummi nassuiaavoq.
Kommuneqarfik Sermersuumi innuttaasut tamarmik qinnuteqarnissaminnut periarfissinneqartarput.
Ataqatigiinneq
Angalanissamut aningaasaateqarfiup siunertaraa innuttaasut nunatsinni avataanullu angalanissaannut periarfissinniarlugit aammalu ilaqutariit imminnut attaveqaannarnissaat, Nunattalu kulturianik imaluunniit allat kulturiannik paasisimanninneq attatiinnarumallugu.