?Innuttaasut ataasiinnarmut saaffiginnittassapput
Qasigiannguit borgmesteriat Jess Svane Avannaani ikaarsaariarnermut ataatsimiititaliami siulittaasunngussaaq.
– Siusinnerusukkut misilinneqarsimanngilaq, taamaattumik aamma suliamik iluatsitsisoqarsimananilu iluatsitsinngitsoortoqarsimanngilaq.
Taamatut oqarpoq Qasigiannguit borgmesteriat 48-nik ukiulik Jess Svane, Siumut, taannalu Avannaata kommuniani ikaarsaariarnermi ataatsimiititaliami siulittaasunngussaaq.
Suliallu nutaarluinnaat suliarisussanngoramigit Jess Svanep suliassaq tunniusimalluni isumalluarlunilu ornippaa - taamatullu qinigaanini qujamasuutigalugu.
– Ingerlatseqatigiit Siumup Atassutillu suleqatigiilluarnissaat upperaara, Jess Svane Sermitsiamut oqarpoq.
Taassuma oqaatigaa ingerlatseqatigiit kommuninit arfineq-pingasunit tamanit, ukiortaamiit Avannaani kommuninngortussami, ilaasortaqartut.
Taamaasilluni ingerlatseqatigiit qulakkeerinnipput maanna kommuninit arfineq-pingasunit arlaannaalluunniit kommunersuarmi puigorneqassanngitsoq.
Illua’tungiliuttulli aamma peqataassapput:
– Ikaarsaariarnermut ataatsimiititaliami ilaasortat 21-it tamarmik akornanni atituumik suleqatigiinnissamut qaaqqusivunga, Jess Svane oqarpoq.
Sermitsiaq nutaaq atuaruk.