Innuttaasut toqqissisimanatik kommunimut sianertaartut
Ilulissani innuttaasut toqqissisimannginnertik pillugu kommunimut sianertartut borgmester oqaluttuarpoq. Ataatsimoornissarput tapersersoqatigiinnissarpullu pisariaqarpoq, Palle Jeremiassen oqarpoq.
Avannaata Kommuniani borgmester Palle Jeremiassen Uummannami tikeraarnerminut atatillugu nereqatigiittuniinnermini kalerrinneqarpoq inuup toqungasup timaata ilaanik Ilulissani ikuallaavimmi nassaartoqarsimasoq.
- Amilaarnaarpoq. Nereqatigiinneq qimaannartariaqarsimavara nassaartoqarsimanera eqqarsaatigiunnaarneq ajulerakku, borgmester Palle Jeremiassen oqaluttuarpoq.
Ilulissanut tikereernermini innuttaasut toqqissisimanissaat anguniarlugu iliuuseqartoqarnissaanik kommuni aalajangerpoq. Kommunimi innuttaasunit, toqutsisimasumik illoqarfeqateqaratarsinnaanerminnik ernumassuteqartunit, sianerfigineqaqattaarsimavoq.
- Uagut akisussaaffigaarput innuttaasut toqqissisimanissaat. Tamanna suliassatut tiguarput, taamaammat ilaatigut pisuttuaqatigiissitsivugut, tassanilu oqariartuutima pingaarnerit ilagaat ataatsimoornitsinnik misiginneqataanitsinnillu takutitsissasugut, Palle Jeremiassen oqarpoq.
Ikiuigasuartussanik ujaasisut
Borgmesteri oqaluttuarpoq politiit paasiniaallutik piaartumik suligasuarnerat toqqissinartillugu. Ikuallaavik maanna assersorneqarsimavoq, timip toqungasup ilaanik nassaartoqareernerata kingorna misissuisoqarluni. Borgmesterillu erseqqissaatigaa kommuni paasiniaanermi toqqaannartumik suleqataasussaanani, oqartussatulli oqaloqatigineqarsinnaasunik ikiuigasuartussanik neqeroorluni.
- Nukigut tamaasa tassunga maanna atorpagut. Paasiniaanermi suleqataasut oqaloqatigisinnaasaannik ikuigasuartussanik neqerooruteqarpugut. Ikiuigasuartussallu oqaloqatiginnittartut suli amerlanerusut pisariaqartikkatsigit illoqarfiit allat maanna oqaloqatigivagut, ikiuigasuartussanik tikisitsiumalluta, Palle Jeremiassen nassuiaavoq.
Politiit ikiorsigit
Suliamut tunngassuteqartuni politiit innuttaasunit ikiorneqarumallutik nalunaaruteqartarput. Innuttaasut ilisarisimasaminnik attaviginnissinnaajunnaarsimagunik politiinut nalunaaqquneqarput. Aammali piffissami 27. september - 2. oktober akornani eqqaavinni illoqarfiup iluaniittuni eqqumiigisinnaasaminnik takusaqarsimagunik politiinut saaffiginneqquneqarlutik.
- Innuttaasut kaammattorpakka politiinut suleqataaqqullugit. Takusimasarnik eqqumiigisaqaruit, ilaqutarnik ikinnguternilluunniit attaviginnissinnaajunnaarsimaguit, taava politiinut saaffiginnigit. Piffissami matumani immitsinnut ikioqatigiinnissarput pisariaqarluinnarpoq. Ikioqatigiikkutta tapersersoqatigiillutalu piffissaq imaannaanngitsoq aqqusaagarput oqinnerusumik qaangersinnaavarput, Palle Jeremiassen naggasiivoq.