Internet Guutip nunatsinnut tunniussaraa
Kaali Olsenip meeqqat atuarfiani internetimut atuineq annertusarusuppaa.
- Internet nassaajuvoq pitsaalluinnartoq, ingammik nunami asiilasuumi nunatsitut ittumi inukittumi, IA-miit Kaali Olsen oqarpoq.
Uggornartutut isigaa internetip atorneqarnera taama killeqartigimmat. Ilinniartitaanerup iluani EDB-mut aningaasanut inatsimmi 10, 4 million missaat aningaasaliissutaapput. Tele Greenlandilli akiisa qaffasinnerujussuatigut meeqqat atuarfiani ilinniarfinnilu internetip atorneqarnera killilerujussuuvoq, allakkianik tigusinissamut nassiussinissamullu atorneqarnerulluni, assinik, nipimik Facebookimullu atussallugu killilerujussuulluni.
- Silarsuup sinneranut matut ammarnissaannut internet atortariaqarparput, Kaali Olsen oqarpoq, takusinnaavaalu internet aqqutigalugu ilinniagassanik ilisimasanillu killeqanngiusartumik aallartoqarsinnaasoq, ikinngutigiinnerit inuillu akornanni paaseqatigiinnerit pilersinneqarlutik.
Aammali ajutoorfissaqarpoq: Angerlarsimaffiit amerlanerujartortut internetimut attaveqarput, ilaqutariippassuilli teknologi nutaaq suli atulersimanngilaat.
-Tamanna ernumanartoqarpoq, inuimmi ilaat internetimi ingerlarsorput ilaqutariilli allat ineriartornermut nalinginnaasumut malinnaasinnaanatik, Kaali Olsen oqarpoq.