Inuiaat sammillugit
Juliane Henningensen Københavnimi NORA-p ataatsimeersuartitsinerani peqataalluni nunap pisuussutai pingaarnerpaat; inuiaat, sammivai.
- Uagut Den Nordatlantiske Gruppe-mi sulinitsinni anertuumik sumiiffiit avinngarusimasut sammivagut. Minnerunngitsumik oqallisigaltigillu nalilersorpagut, Kalaallit Nunaanni Savalimmiunilu inissisimanerminnut atatillugu ajornartorsiutaat, innuttaasa allanut nussornerisa piginnaasallillu aallakaanerisa ajornartorsiutit pilersitaat. Kalaalerpassuit Savalimmiorpassuillu ukiut tamaasa Danmarkimut ilinniariartorlutillu suliartortarnerat nalunngilarput. Taakkualu ilarpassuisa Danmarkimi nunasiinnartarnerat ilanngullugu. Tamanna uagutsinnut ajoqutaavoq, tamatumuuna Kalaallit Nunaata Savalimmiullu ineriartorneranni iluaqutissarigaluagut tammartarmata, Juliane Henningsen saqqummiinermini ilaatigut oqarpoq.
Juliane Henningsen, Den Nordatlantiske Gruppe-meersoq, NORA Region Conference 2011, København-imi ingerlaneqartumi oqalliseqataavoq, atlantikup avannaani inuit sumiiffinni assigiinngitsuni najugaqarnerat, assartuineq, attaveqaqatigiinissap aaqqissuussaanera inuussutissarsiutinillu ineriartortitsinerlu aallaavigalugit. NORA (Nordisk Ministerrådip ataani Nunani Avannarlerni atlantikup avannaa pillugu suleqatigiit kattufiat) ataatsimeersuarnermik aaqqissuisuuvoq, Kalaallit Nunaanniit, Islandimiit, Savalimmiuniit Norgemiillu aallartitat nunat soorlu innuttaasa nutsernerisa piginnaanillillu aallakaanerisa ajornartorsiutit pilersitai pillugit oqalliffiusumik.
Den Nordatlantiske Gruppe-p misissuinera naapertorlugu kalaallit 18.000-it missaannik amerlassusillit Danmarkimiipput, tassa Kalaallit Nunaanni najugallit pigasorarterutaat. Naak Kalaallit Nunaanni sulisorineqarsinaasut piginnaasallit amigaataangaluaqisut. Taamaammat gruppe-mi misissorneqarpoq, kalaallit Danmarkimiittut piginnaasaat suunersut, qanoq ilillutillu Kalaallit Nunaannut uteraluarunik, inuiaqatigiit kalaallit ineriartornerannut tapeeqataasinaanerigaluat.