Inuit Ataqatigiit aningaasanut inatsisissamut isumaqatiginninniutissatik saqqummiuppaat

'Toqqissisimaneq anersaakkullu ineriartorneq' Inuit Ataqatigiinnit anguniarneqarpoq.

Taakku aningaasanut inatsisissamut aappaagumoortumut partiimit isumaqatiginninniutigineqassasut partii tusagassiutinut nalunaaruteqarpoq.

- Inuit Ataqatigiit Aningaasanut Inatsisissami pingaarnertut qulakkeerusuppaat inuit ulluinnarni atugaasa, inuiaqatigiit atugarissaarnikkut periarfissaasa pisinnaatitaaffiisalu nukinnik atuiffiunissaat aningaasalersorneqarnissaallu, partiimi siulittaasoq Múte Bourup Egede oqarpoq.

Isumaqatigiinninniarnissamullu pingaarnertut pingasunik ima partii saqqummiussivoq:

• Meeqqat ilaqutariillu atugaannik suliat sakkortusisamik pitsanngorsaataasussat. Meerartagut ilaqutariillu tassaammata nunatta siunissai, sutigut tamatigut ingerlalluarnissatsinnut siuariartornissatsinnullu qitiulluinnartut. Toqqissisimasumik inuunissaannik qulakkeerinniffigisariaqakkavut. Nunarpullu inuttusiartoqqilissappat avaqqunneqarsinnaanngitsumik iliuuseqarfigisariaqakkavut.
• Nunatsinni utoqqalineq imminut akilersinnaasariaqarpoq. Anguniarparput nunatsinni utoqqaat atugaasa nunani allani utoqqaat atugaannut unammillersinnaanngussasut. Ukiuni aggersuni utoqqartavut amerliartussapput ukiorpassuarnilu sulilluarsimareerlutik pitsaasumik atugaqarnissaat qulakkeerneqartariaqarluni. Nunarpummi inukilliartuinnassanngippat aanaakkut aataakkullu nunatsinni aamma periarfissagissaarnerusariaqarput.
• Kulturilerisortatta atugaannik pitsaanerulersitsineq. Timi tarnilu nukittuut pilersissallugit kulturilerisortagut qitiulluinnarmata. Isumaginninnukkullu unammilligassaqarnitsinni ilorraap tungaanut nikisitseqataasinnaassusaat upperigatsigu. Kiisalu inuussutissarsiornikkut ineriartornitsinni nutaaliornikkut peqataalluarsinnaammata.

Innuttaasunut sunniuteqartariaqartoq

Aningaasarsiornikkut ingerlalluarneq innuttaasunit malugineqartariaqartoq Múte Bourup Egede oqarpoq.

- Kissaatinik allanik aamma inuiaqatigiit ineriartornerannut ulluinnarnilu atugaaannut, ilinniartitaanikkut allatigullu sunniuteqarluartussanik kissaateqassaagut.
Isumaqatigiinninniutiginissaannullu piareersimalluinnarluta, qulaani taasatsinnut iliuusissat tigussaasut isumaqatiginninniutiginissaat qilanaaralugit, IA-mi siulittaasoq oqarpoq.