qinersineq
Inuit Ataqatigiit qinigassanngortitaat akuerineqartut
Inuit Ataqatigiit qinigassanngortitaasa allattorsimaffiata piffissaq eqqorlugu tunniunneqarsimanera qinersinermut ataatsimiititaliap akueraa
Tallimanngormat nalornissutigineqaleraluarpoq Inuit Ataqatigiit qinigassanngortitaasa allattorsimaffia piffissaq eqqorlugu tunniunneqarsimanersoq.
Tamanna pivoq Inuit Ataqatigiit qinigassanngortitamik allattorsimaffia tallimanngornermi ullup qeqqanut atsiorneqanngitsoq tunniummassuk, atsiorneqannginneranullu pissutaavoq Kommuneqarfik Sermersuumit kukkusumik siunnersorneqarneq. Kommuunip kukkussutini aamma ualeq taanna nassuerutigaa, qinersinermullu ataatsimiisitaliamut IA piffissaq eqqorlugu tunniussisimasut innersuullugu.
Atuaruk: Qinersinermut Ataatsimiititaliap aalajangiinissaq kinguartippaa
Qinigassanngortittut akuerineqartut
Qinersinermut ataatsimiititaliap Inuit Ataqatigiit qinigassanngortitai ataasinngornermi ataatsimiinermini piffissaq eqqorlugu tunniunneqarsimasutut akuersissutigai.
- Qinersinermut Ataatsimiititaliap aamma aalajangerpaa suliap suliarineqarnera Qinersinermut Ataatsimiititaliap internetsikkut tamanut saqqummiutissagaa, tamannalu aamma pillugu tusagassiorfinnut nalunaaruteqartoqassasoq. Suliap suliarineqarnera nutserneqareerpat nittartakkami takusassanngorlugu inissinneqassaaq.
Qinersinermut ataatsimiititaliami siulittaasoq, Svend Hardenberg, taama nalunaaruteqarpoq.
Qinersinermut ataatsimiititaliami ilaasortaapput: Svend Hardenberg, Namminersorlutik Oqartussat allattoqarfianni pisortaq, Kanukokap pisortaa Hans Peder Barlach Christensen aamma biskop Sofie Petersen.