Inuit marluk meeqqamik pinngitsaaliilluni atoqateqarsimaneq pillugu unnerluutigineqartut
Inuit marluk meeqqanik pinngitsaaliilluni atoqateqartarsimaneq pillugu unnerluutigineqarput. Politiit naapertorlugit,angutip meeqqamik 15-it inorlugit ukiulimmik pinngitsaaliilluni atoqateqarsimaneranut atatillugu unnerluutineqartup aappaa akilersissimasutut unnerluutigineqarpoq.
Angut 24-nik ukiulik meeqqamik 15-it inorlugit ukiulimmik pinngitsaaliilluni marloriarluni atoqateqarsimasutut unnerluutigineqarpoq, suliamilu tassani pineqartumi niviarsiaraq 18-it inorlugit ukiulik pinngitsaaliilluni atoqateqarsimasutut aamma unnerluutigineqarluni. Niviarsiaraq meeqqamik 15-it inorlugit ukiulimmik kinguaassiuutitigut innarliisimatut aamma unnerluutigineqarpoq, unnerluussut naapertorlugu niviarsiaqqap pineqartup niviarsiaraq 15-it inorlugit ukiulik angummut pinngitsaalillugu atoqatigititinniarlugu aningaasanik akilerneqarluni isertissimavaa.
Unnerluussisussaatitaasut angut ukiuni sisamani qaammatinilu arfinilinni pineqaatissinneqarsimasut inissiisarfianniititassatut pineqaatissinneqassasoq kiisalu pinerluffigineqartumut marloriarluni 150.000 koruuninik taarsissuteqassasoq piumasaraat, niviarsiararlu pinerluffigineqartunut 50.000 koruuninik aamma 10.000 koruuninik akiliuteqassasoq piumasaralugu. Unnerluussisussaatitaasut niviarsiaqqap pineqaatissinneqarnissaanut piumasaqaateqartoqarnissaata sillimaffigineqarnissaa oqaatigaat.
Inunnut taakkununnga marlunnut unnerluussutini Sermitsiaq.AG-mit takuneqarsimasuni tamanna allassimavoq.
Angut niviarsiararlu pissutsini katillugit pingasuusuni unnerluutigineqarput, unnerluussummi siullermi meeqqamik 15-it inorlugit ukiulimmik pinngitsaaliilluni atoqateqarsimaneq pineqarpoq, unnerluussisussaatitaasut naapertorlugut tamanna 2020-mi ukiakkut pisimavoq.
Meeqqap angutillu naapeqatigiinnissaat piareersarsimagaa
Pineqartumi tassani angutip niviarsiaraq isumaqatigiissuteqarfigalugu, niviarsiaraq 15-it inorlugit ukiulik pinngitsaalillugu atoqatigisimavaa.
Unnerluussut naapertorlugu, niviarsiaqqap pinngitsaalisaalluni atoqatigineqarnermini angut arlaleriarluni ajattortarsimagaluarpaa, arlaleriarlunilu uneqqusarsimagaluarlugu. Unnerluussut naapertorlugu niviarsiaqqap unnerluutigineqartup pinngitsaaliilluni atoqatiginninneq isiginnaarsimavaa.
Unnerluussummi pissutsit aappaani, niviarsiaraq meeqqamik 15-it inorlugit ukiulimmik kinguaassiuutitigut innarliisimasutut unnerluutigineqarpoq.
Unnerluussut naapertorlugu, niviarsiaqqap 2020-mi ukiakkut angutip meeqqallu Nuummi allaffimmi naapeqatigiinnissaat piareersarsimavaa.
Naapeqatigiinneq pinngitsaaliilluni atoqateqarnermik kinguneqartoq 300 koruuninnassutigisimagaa
Unnerluussummi allassimavoq, angutip niviarsiaraq allaffimmi atoqatigisimavaa. Niviarsiaraq unnerluutigineqartoq pisup nalaani allaffiup eqqaani inimi allamiissimavoq, pinngitsaaliilluni atoqatiginninneq pereermat 300 koruuninik akilerneqarsimalluni. Unnerluussut naapertorlugu akiliuteqarnissaq isumaqatigiissutaareersimavoq.
Angut pillugu suliaq immikkut ittumik suliarineqassaaq, pinngitsaaliillunilu atoqateqarsimasutut unnerluutigineqassalluni, eqqartuussinissamut allattorsimaffimmi tamanna atuarneqarsinnaavoq.
Unnerluussummi suliassaq kingulleq tassaavoq, angutip 24-nik ukiullip meeqqamik aqqaneq-marluk inorlugit ukiulimmik pinngitsaaliilluni atoqateqarsimasutut unnerluutigineqarnera. Pinngitsaaliilluni atoqateqarsimaneq 2016-imi pisimavoq, tassani unnerluutigineqartup niviarsiaraq inimut parnaaruteriarlugu pinngitsaalillugu atoqatigisimavaa.
Suliaaq Sermersuup Eqqartuussiviani apriilip qaammataa aallartippat eqqartuussutigineqassaaq. Sermitsiaq.AG-p unnerluutigineqartut taakku marluk illersuisui attavigisimavai, taakkuli illersukkamik unnerluussutinut qanoq isumaqarnerat maannakkorpiaq oqaatigisinnaannginnerarpaat.