Inuit marluk tigummigallarneqartut: Ikiaroornartumik eqqusseriaasutut pasineqarput
Inuit marluk, ataaseq Aasianni aamma ataaseq Nuummi, politiinit tallimanngormat tigusarineqarput. Taakku ikiaroornartumik iioraariarlutik nunatsinnut eqqusseriarsimasutut pasineqarput. Tigummigallarneqarnerup sivitsorneqarnissaa pillugu eqqartuussivimmi ullaap tungaa sassartinneqassapput.
Angalasut marluk, ikiaroornartumik iioraariarlutik nunatsinnut eqqusseriarlutik angalasutut pasisat, Kalaallit Nunaata Politiivisa tallimanngornermi ullaap tungaani tigusaraat. Taakku Danmarkimiit aallannginnerminnit ikiaroornartumik iioraasimasutut pasineqarput.
- Ataaseq Aasiaanni tigummigallarneqarpoq, aappaalu Nuummi. Tigummigallarneqarnerup sivitsorneqarnissaa pillugu eqqartuussivimmi ullaap tungaani sassartinneqassapput, Kalaallit Nunaata Politiivini pigaartut pisortaat, Malik Olesen Sermitsiaq.AG-mut ilisimatitsivoq.
Ulorianarsinnaasoq
Qanoq sivisutingisumik tigummigallarneqassanersut, politiinit maanna oqaatigineqarsinnaanngilaq.
- Soorunami apeqqutavoq ikiaroornartoq qanoq annertutingisoq iineqarsimanersoq. Ikiaroornartoq iineqarsimasoq timaanniikkunnaarnissaat soorunami aamma utaqqivarput, Malik Olesen oqarpoq.
Kalaallit Nunaata Politiivisa maannakkut ilisimatitsissutigisinnaanngilaat tigummigallarneqartut nunatsinnukarnerminni angalaqatigiinnissamik isumaqatigiissuteqarsimanersut.
Kalaallit Nunaata Politiivi ukioq manna siornalu arlalinnik tigummigallagaqartarput, ikiaroornartumik iioraariarlutik nunatsinnut eqqusseriartunik pasisaminnik. Ikiaroornartumik iisisimatillutik nunatsinnut eqqusseriartut ilaat ajunaartartut ukioq manna siornalu naammattoorneqartarput.