Inuit pisinnaatitaaffii isiginiarnerullugit
Naalakkersuisut Inuit Pisinnaatitaaffii pillugit Sullissivimmik qitiusumiit ataatsimoortumik nunatsinni pilersitsinissamik soqutigaat
- Naalakkersuisut malitseqartitsinerisa kiiliffiat tassaavoq, Nunatsinni inuit pisinnaatitaaffiinik suliaqarnerup nukittorsarneqarnissaanut suliniutaasinnaasut assigiinngitsut pillugit Naalakkersuisut Danmarkimi Inuit Pisinnaatitaaffii pillugit lnstitutsimik (Dansk Institut for Menneskerettigheder) oqaloqatiginnittuarnerat.
Taama oqarpoq naalakkersuisut siulittaasuat Kuupik Kleist, Akitsinnguaq Olsen, Siumut sinnerlugit Inatsisartunut ilaasortap paragraf 37 aqqutigalugu apeqquteqaataanut akissummi.
Taanna apeqquteqarpoq; Sullissívimmik qitiusumiit ataatsimoortumik nunatsinni pilersitsinissamik, Danmarkimi Naalakkersuisut suleqatigalugit Nunatsinni Naalakkersuisut periarfissanik misissueqqullugit peqquneqarnissaanik lnatsisartut UKA 2008/85imi aalajangiinerata kingorna killiffik pillugu Naalakkersuisut nassuiaateqarsinnaappat?
- Apeqqummut qulaani pineqartumut Naalakkersuisut malitseqartitsinerisa kiiliffiat tassaavoq, Nunatsinni inuit pisinnaatitaaffiinik suliaqarnerup nukittorsarneqarnissaanut suliniutaasinnaasut assigiinngitsut pillugit Naalakkersuisut Danmarkimi Inuit Pisinnaatitaaffii pillugit lnstitutsimik (Dansk Institut for Menneskerettigheder) oqaloqatiginnittuarnerat.
- Nassuiaatissarsiorluni suliaqarnermut tassunga atatillugu Dansk Center for Internationale Studier og Menneskerettigheder aamma Dansk institut for Menneskerettigheder, ullumikkut tassaasut Institut for Menneskerettigheder aamma Dansk Institut for Internationale Studier, atorunnaarsinneqarnissaat pillugit danskit naalakkersuisuisa inatsisissatut siunnersuut saqqummiuppaat., Kuupik Kleist nassuiaavoq.
- Taassuma saniatigut immikkut Dansk Institut for Internationale Studier aamma immikkut Institut for Menneskerettigheder - Danmarks Nationale Menneskerettighedsinstitution - pilersinneqarnissaat pillugit inatsisissatut siunnersuummut missingiut tusarniaassutigalugu nassiunneqarpoq.
- Nunanut allanut Pisortaqarfiup inatsisissatut siunnersuutit Namminersorlutik Oqartussani tusarniaassutigineqarnerat ataqatigiissaarpai, tusarniaanermut akissutit 19. marts kingusinnerpaamik Udenrigsministeriaqarfimmi tiguneqareersimassapput. lnatsisissatut síunnersuummi takuneqarsinnaavoq, kunngip peqqusineratigut inatsit pineqartoq Kalaallit Nunaanni atuutsinneqalersinnaasoq.
Inuit pisinnaatitaaffii pikkoriffiginerusariaqarput
Kuupik Kleist naapertorlugu Inuit pisinnaatitaaffiinut tunngatillugu pikkoriffigisai Naalakkersuisut suli atorluarusuppaat. Ilutigalugu Naalakkersuisut soqutigisarivaat, Nunatsinni inuit pisinnaatitaaffiisa iluanni pikkorissuseqarnerup annertusarneqarnissaa.
- Institut for Menneskerettighederimik suleqateqaannarnissamut atugassarititaasut eqqortut suliarineqarnissaat siunertaralugu Namminersorlutik Oqartussat tusarniaanermut akíssuteqarnerminni siunnersuutigaat, Nunatsinni inatsisip atuutsinneqalernissaa pillugu aalajangiisoqarnera (tassa kunngip peqqusineratigut Nunatsinni inatsit atuutsinneqalerpat) ilutigalugu aalajangiisoqassasoq, Kalaallit Nunaanni Inuit Pisinnaatitaaffií pillugit Siunnersuisoqatigiit pilersinneqarnissaat, siunnersuisoqatigiillu taakkua periarfissinneqassasut Institut for Menneskerettighederip siulersuisuinut ilaasortassamik toqqaanissaat inatsisissatut siunnersuummi periarfissinneqassasut, Kuupik Kleist naggasiivoq.