Inuit pisuussutinut aalajangeeqataasassapput
Nunat inoqqaavisa aalajangigassanut peqataatinneqartarnissaat pillugu nalunaarusiaq FN-imi immikkut ilisimasallit aappaagu tunniutissavaat.
Immikkut ilisimasallit suliaata qiteqqunnera Genevemi sapaatip akunnerani uani nalilersorneqarpoq, Inuit Issittormiut Siunnersuisoqatigiiffianni, ICC-mi, siunnersorti, Sara Olsvig, tassani peqataalluni, knr.gl allappoq.
Suliniutit innuttaasut ulluinnarni inuunerannut attuumassuteqartut pillugit aalajangiisoqassatillugu, Inatsisartut kalaallit sinnerlugit akuersillutilluunniit naaggaarsinnaapput.
Soorlu Maniitsumi alumiiniuliumik aatstsiviliassaq imaluunniit Narsap eqqaani Kuannersuarni aatsitassarsiornissamik pilersaarutit tamakkununnga ilaapput.
Innuttaasut aalajangigassanut arlalitsigut akuutinneqarsinnaassapput, soorlu taasisinneqarnikkut.
"Pituttorsimanngitsumik, siuliatut ittumik paasissutissiissutigineqareersumillu akuersineq" tassani qitiusumik isumaavoq. Isumalu taanna ataatsimiinnermi oqallisigineqarpoq, Sara Olsvig nassuiaavoq.
- Soorlu annertuunik aalajangiisoqassatillugu innuttaasunut paasisitsiniaanerit pineqarput. Tamakku ammasuusariaqarput, ersarissuullutillu illuinnaasiortuussanatik.
ICC saamillu suleqatigiiffimmi peqataapput. Taakku siunnersuutigaat immikkut ilisimasallit pisinnaatinneqassasut nalunaarusiap inerneriumaagai nunat malinneraat malinnaaffigissagaat.
Nalunaarusiaq FN-ip INuit Pisinnaatitaaffii pillugit Siunnersuisooqatigiiffiannut Menneskerettighedsrådimut aappaagu tunniunneqassaaq.