Inuppassuit inissiani attartortittakkani aserfallakkaluttuinnartuni najugaqarput
Namminersorlutik Oqartussat kommunillu inissiaataat aserfallakkiartorput 1 million koruunit affaaniit 1 million koruuninut - ullormut.
Iluarsaassinissamik kinguaattooruterpassuit 3 milliarder koruunit missaannut amerlisimapput, pisortanilu inissiat attartortittakkat amerlanersaat ullumikkut ima nallinnartigisumik pitsaassuseqalersimapput, Ineqarnermut Attaveqaqatigiinnermullu Naalakkersuisoqarfimmit inissiatut aserfallalluinnarsimasutut oqaatigineqarnissaat nangaassutigineqarnani.
Ajorseriartornerallu sukkasoorujussuuvoq: Namminersorlutik Oqartussat kommunillu inissiaataat attartortittakkat ullormut 1 million koruunit affaanniit 1 million koruuninut aserfallattarput.
Imaluunniit ukiumut 190 millioner koruuniniit 380 millioner koruuninut, aviisi Sermitsiaq allappoq.
Altaninik iluarsaassinerit
Taamaammat iluarsaassinissamut akissaqarnersugut apeqqutaajunnaarsimavoq, kisiannili maluginiarneqartariaqalersimalluni iluarsaassinnginnissaq akissaqarfiginngikkipput. Ilaginnaaginnaraluaruttaluunniit akiligassat takkutissaqqaarput. Tamanna Nuummi, Paamiuni, Qaqortumi, Maniitsumi Sisimiunilu altaninik tassanngaannaq iluarsaassisariaqalernermut, nunatta karsianut 2018-20-mi 159 millioner koruuninik akeqartumut, atatillugu takuarput.
Inissiat Inatsisartut ataatsimiinnerini oqaluuserisassatut aalajangersimasumik inissisimasarput; aamma ukiakkut ataatsimiinnermi naammassineqaqqammersumi. Ineqarnermut Attaveqaqatigiinnermullu Naalakkersuisoq Karl Frederik Danielsen inissianut tamarmiusunut pilersaarummik siunniussaqarsimavoq, iluarsaassinissamut kinguaattoorutinik angumerinniffiuinnartussaanngitsumik, aamma siornatigut kukkussutit uteqqinnarnissaannik pinngitsoortitsissutaasussamik.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: