»Inuuninni aqutissara sammiveqalerpoq«
Gerda Rafaelsen Københavnimi Kalaallit Illuanni siunnersuinermik suliniummi imminut tulluussakkamik ingerlataqareerluni juullereerpat ilinniakkamik aallartitsissaaq. Aaqqiissut allani assingusumik aaqqissuussinissamik isumassarsiaasinnaasoq.
Inoqarpoq naqqanneqqiffissaarullutik ikiortarialerujussuarnik. Ilaqarpulli aamma eqqortumik ajattarneqalaarlutik aqqutissaminnik nassaarsinnaasunik. Immaqa siunnersuisumit.
Aviisi AG allappoq.
Kalaallit Illuanni Københavnimiittumi siunnersuinermik suliniut Ilik inissisimavoq, AG-millu apersorneqarnissamut decembarimi ulloq qulisimallunilu avaanngunakujuttoq siunnersuisoq Marianne Olsen siunnersorneqartorlu Gerda Rafaelsen naapiffigissallugu toqqarsimavaat. Covid-19-imit killersuutit Danmarkimi atugaaqqilersimapput, qanermut assiaqutit qungujummik assersuillutik assammillunilu ilassineq eqqumiilaartumik ilassininngorsimavoq. Qanermulli assiaqutip illuani qungujunneq kissalaarlunilu inussiarnerpoq.
- Marianne ukioq ataaseq matuma siorna naapippara siunnersorneqarnissamik suliniummut peqataarusullunga Kalaallit Illuannut saaffiginnereerlunga. Kommunerisanni suliffissarsiuussisarfimmut saaffiginnittarsimagaluarpunga, kisianni periaasiat allaaneruvoq siunnersuinerallu uannut kissaatinnullu naleqqunnatik. Isumaginninnermut peqqissaanermullu ikiortitut imaluunniit perorsaanermut ikiortitut ilinniaqquaannga. Tassa periarfissat pisakka. Siunnersuinermik suliniummi amerlanerusunik periarfissinneqarpunga, Gerda Rafaelsen 33-inik ukiulik oqaluttuarpoq.
Danmarkimi 2004-mili najugaqarpoq, taamani 15-inik ukiqarluni Aasianniit ilisimalluakkaminit Danmarkimut anaanani ornillugu nuukkamili. Marlunnik ukioqarluni anaanami aallarneranit Aasianni aanamini peroriartorsimavoq. Gerdap peroriartornera oqitsuinnaasimanngilaq meeqqallu atuarfiat naammassisimanagu, tamannalu inuunermini aqqutissarsinissaminut ajornartorsiuteqarnerminut ilapittuutigisimallugu.
Oqaluttuaq tamaat aviisimi AG-mi sapaatip-akunnerani matumani saqqummersumi atuaruk, ugguuna iserfigisinnaavat: