?Inuussutini pingaarnerutitaq: Akileraartartut aningaasaataannik aningaasaatilissuusaarneq
Inuussutissarsiutit siuarsarnerannik aaqqissuussinerup 2005-imi nutarterneqarneranut atatillugu inuussutissarsiutinik ineriartortitsivik Sulisa A/S selskabimut aningaasanik siammarsaasumut allanngortinneqarpoq pingaarnerusutut siunertaralugu inuussutissarsiorfinni tamani ingerlatsivinnut suliniutinullu, niuernermi atugassarisat malillugit aningaasanik atugassaqartitsisinnaaneq.
Piviusuunerusumik Greenland Venturep quppernerani nittartakkami allassimavoq: »Greenland Venture pingaartumik aningaasaliissuteqartarpoq piginneqatigiittutut ikinnerussuteqartutut, pingaannginnertut piginneqatigiittut amerlanerussuteqartutut, kisimiillunili piginnittuunngisaannartutut«.
Taamaasilluni aningaasaliissuteqarnermik selskabip Namminersornerullutik? Oqartussanit pigineqartup suliassarinngilaa nammineerluni pisortat namminersortulluunniit ingerlatsiviini pigisanik pisiortornissaq.
Demokraatit ilisimanngilaat aningaasaliissuteqarnermut selskabip, ingerlatsivinnik ineriartorsinnaasunik aningaasanik pilersuilluni tapiissuteqartussap, nammineerluni pilersaarutigigaa Arctic Green Foodip ilaata?KNI-millu angallatinik pisinissaminik pilersaaruteqartoq, soorlu Sermitsiaq Inuussutini sapaatip akunnerani kingullermi atuarneqarsinnaasoq.
Tamannali Greenland Venturep siunertarinngilaa, taamaattumik soorunami naatsorsuutigisariaqarpoq Greenland Venture ingerlatsivimmik namminersortumik suleqateqarluni taaneqartunut neqerooruteqarsimasoq.
Greenland Venturemi suleriaaseq eqqarsaatigalugu mamiasuttorujussuulluta Sermitsiami nutaarsiassaq atuarparput, naqiterivimmik Namminersornerullutik? Oqartussanit pigineqartumik neqerooruteqarnissamut killissarititaq minutsinik pingasunik sioqqullugu Greenland Venturep suleqatigisani nalunaarfigisimagai aningaasanik siammarsaaso suliniummi peqataajumajunnaaginnartoq.
Akerlianik Greenland Venture pisiniartoq alla peqatigalugu neqerooruteqarniarpoq. Pisiniartoq sulisitsisut peqatigiiffiata NUSUKA-p siulersuisuunerini ilaasortaasoq Gerth B. Lynge peqatigalugu, taanna nalaatsortumik Greenland Venturep siulersuisuni siulittaasuulluni (takkuuk www.nusuka.gl).
Pissutaasoq tassaasinnaavoq selskabimik aqutsinermik piginnaaneqanngilluinnarnermit kammalaatersornermut, peqqusersiorluni isumaqatigiissutut atuuttut kingusissukkut kipitillugit - taamaasilluni isumaqatigiissuteqarfigisimasaq piviusumik periarfissaarullugu aningaasaliisussanik nutaamik nassaarniarnissaanut.
Pissusiviusoq eqqoriaannarneqarsinnaavoq. Ataaserli qularnanngilaq: Periutsimut akuersaarneqarsinnaanngitsumut tamatumunnga Namminersornerullutik?Oqartussat akisussaatinneqarnerat. Tamanna atorsinnaanngilaq.
Taamatut oqareerluta Demokraatit upperaat selskabini pioreersuni Kalaallit Nunaannilu aallarnisaanermut kulturimi unneqqarissumik peqqissumillu ineriartortoqarsinnaasoq.
Kalaallit Nunaanni Takornariaqarnermik Inuussutissarsiornermillu Siunnersuisoqatigiit ullumikkut matumut ataatsimut periuseq atorpaa ilaatigut siunnersuisarneq nunamilu inuussutissarsiutini aallarnisaasunut klippekortimik aaqqissuussineq.
Akileraartartut aningaasaataat atorlugit aningaasaatilissuusaartoqarsinnaanngilaq.
Greenland Venturep iliuuseqarsimanera eqqarsaatigalugu Demokraatit perusunneruvaat allanngortitsisoqassaso, taamaasilluni Greenland Venture pissusissamisoortumik Kalaallit Nunaanni Takornariaqarnermut Inuussutissarsiornermullu Siunnersuisoqatigiit ataaniilerluni.