Inuussutini pingaarnerutitaq: ?Akileraarutinut majuartarfik aamma aningaasarsiat malillugit akileraarutit
Qulequtaa amerlanerpaanut uulikullatsitsisinnaavoq, tamannalu pissusissamisoorluinnarpoq, tassa aningaasarsiat malillugit akileraarutit sulerusussuseqarnermut toqunartutut isigineqarajuttarmata.
Nakorsaasiorfinnilli nalunngilarput toqunartut annikitsukkuutaarlugit nappaatinut katsorsaataasinnaasut. Taamatuttaaq aningaasarsiat malillugit akileraarutit aamma sulerusussuseqarnermut sunniuteqarsinnaapput, pisariaqarporli eqqortumik atornissaat.
Taavalu aningaasarsiat malillugit akileraarutit qanoq isilluni Kalaallit Nunaanni sulerusussuseqarnermut siuarsaataasinnaappat?
Taamaalisinnaavoq akileraarutinut majuartarfik eqqukkaanni. Tamanna nassuiartariaqarpoq. Demokraatit tamatigut akerlerisarsimavaat Kalaallit Nunaanni akileraarutit akitsuutillu oqimaassusaat ullumikkumit annertunerussanngitsoq, sulilu taaatut isumaqarpugut. Inatsisartunili amerlanerussuteqartut aningaasarsiat malillugit akileraaruteqartitsisalernissaq tapersersorpaat, taamaattumik periutsip eqqortup eqqunneqarnissaa siunniunneqassaaq.
Akileraarutinut majuartarfik eqqarsaatigisara imatut isikkoqarpoq. Akileraarutinut majuartarfinni tummeqqat qullersaat tassaavoq akileraarutit tamarmiusut annerpaamik oqimaassusissaat, taannalu ullumikkutut 42 procentiussaaq.
Tulliuttut assersuutigalugu tassaassapput 37 procentit, 32 procentit, 27 procentit taamatullu ammut. Sumiiffinnit allanit ilisimaneqartutut inuit ataasiakkaat akileraarutitigut nammatassaat ataasiakkaat aningaasarsiaannut akileraaruteqaataasussanut naleqqussarneqarsimassapput.
Allatut oqaatigalugu akileraarutinut majuartarfik ammut ingerlavoq, taamaasilluni akileraarutit oqimaassusaat ullumikkuminngarnit annertunerulissanani, tamannalu peqatigalugu annikitsumik akunnattumillu aningaasarsiortut akileraarutitigut oqilisaaffigineqassapput. Taamaasilluni ilimagaara sulineq akilernerusinnaassasoq sulinani pilersorneqarnerinnarminngarnit.
Akileraarutinut majuartarfinni tummeqqat allersaatimatut annikitsigissaaq, ilaqutariinnut marlunnik inersimasulinnut pingasunillu meerartalinnut isumaginninnikkut isertitaqarneq akilersinnaassanani. Tamatumuunakkut pisariaqarpoq pisortat ulluunerani paaqqinnittarfinnut, ineqarnermut akiliutinut il.il. tapiissutaat naleqqussarneqarnissaat.
Aammattaaq ilimagaara akileraarutitigut isertitassat, landskarsimi amigaatigineqalersussat isertinneqarsinnaasut amerlanerusut sulilernerisigut tamannalu peqatigalugu isumaginninnermi aningaasartuutit ikinnerulernerisigut. Tamannali qitiusumik allaffissuarmi aningaasarsiornermik ilisimatuut naatsorsussavaat.
Amerlanerusut sulilernerisa aamma kingunerissavaa annertunerusumik naammassisaqarsinnaalerneq, tamannali aqqutigissavarput, tassa nunarsuarmi unammillerneq pissutigalugu Kalaallit Nunaanni sulinikkut angusat tamarmiusut annertusisariaqarmata.
Taamaattumik aningaasarsiat malillugit akileraaruteqartitsineq eqqunneqassappat inuiaqatigiillu naammassisaat annertusissappata akileraarutit majuartarfiat ammukartoq aqqutissaavoq.