Inuussutini pingaarnerutitaq: Ammasuunissamik suleqatiginnissamillu kissaateqarneq oqaluinnarnerinnaava?

Aasaq qinersinerup kingorna naalakkersuisut nutaat politikkikkut aqutseriaasissaq nutaaq nalunaarutigaat, aammalumi akulikitsumik oqaatigineqartarluni ammasuunissaq aammalu kattuffinnik innuttaasunillu atituumik suleqatigiinnissaq.

GA-p aallaqqaammulli Naalakkersuisut isumalluarfigisimavai, arlaleriaqalutalu oqartarsimalluta oqaloqatigiinnissamut ammalluta. Ajoraluartumik misigisimanngilagut pissusiviusut eqqarsaatigalugit Naalakkersuisunit taamatut ammasoqartiginngitsoq.

Soorunami piumasarinngilarput isummavut siunnersuutivullu tamarmik tamakkiisumik akuersaarneqassasut, annertunerusumilli tusaaniarneqarnissarput naatsorsuutigisimagalurparput.

Minnerunngitsumik sanaartornermi pisortat ingerlatarpassui eqqarsaatigalugit, tamakkua ingerlarsivippassuarnut annertuumik pakatsisitsisarsimammata.

Eqqaaginnariarlakka Paamiuni innaallagissiorfik, Nuummi allaffissualiaq nutaaq Qinngutsinnilu inissialiarpassuit assersuutissaasut tamakkiisumik suliarinnitsitsinikkut illoqarfinni ingerlatsiviit mikinerusut suliassanit mattunneqartarnerannut.

GA oqanngilaq suliassani tamakkunani Naalakkersuisut inatsimmik unioqqutitsisimasut, oqaluuserineqarsinnaalluarporli pilersaarutit ilaasa pilersinneqarnerat neqerooruteqarnermut inatsisip siunertaanut naapertuunnersut.

Silaannaq salitsigu
GA-p tamatigut aalajangiinerit sunnerniartarsimavai, nunami inuussutissarsiutit aaqqissuussaanerat eqqarsaatigalugu. Arlaleriarlutali allagaatinik takunnissinnaasarsimanngilagut kissaatigigaangatsigu pissutsit misissorneqarnissaat, isumaqarfigisavut innuttaasut soqutigisaat pissutigalugit peqqissaartumik qulaajarneqartariaqartut.

Paasisinnaalluarparput Naalakkersuisut pingaarutilippassuarnik tulleriiaarisariaqartut, akuersaarsinnaanngilarpulli allagaatinik takunnissinnaannginnerput, tamanut ammasuunissamik inatsit ingerlatsinermullu inatsit malillugit pisinnaatitaaffitsinnik.

Aammalu nunami politikkikkut aqutsisut pissutsit maanna atuuttut pissutigalugit nukissat, inuussutissarsiornermi kattuffiit pigisaat, saneqqutaaginnarsinnaanngilaat.

Aallaqqaataani oqarpunga GA-p aallaqqaataanit Naalakkersuisut isumalluarfigigai. Suli taamaappugut kissaatigaarpullu anguniagalimmik oqaloqatigiinnermut peqataajuarusuttugut. Illua’tungeriilli aappaannaa piviusumik suleqatiginnikkusuppat sunniuteqarnissaq ajornakusoorpoq. Inassutigeqqikkusupparpulli Naalakkersuisut namminneq oqaatigisaattut tusaaniarnissaq, ataqqinninnissaq ammasuunissarlu.

Tatigalugu imaqanngitsumik oqalunnerinnaanngitsut kajumissaarutigaarput – sapinngisamik sukkanerpaamik – ataatsimoorluta silaannaq salissagipput.