Inuussutini pingaarnerutitaq: Aqutsineq pitsaanerusoq sakkortunerusumillu pingaarnersiuineq
Peqqinnissaqarfik tusagassiorfinnit sammineqarluartarlunilu qineqqusaarutigineqarluartarpoq. Avisit tusagassiuutillu eletroniskiusut oqaluttuarnik peqqinnissaqarfimmut tunngasunik ulikkaartarput. Peqqinnissaqarfik inunnik sullissiviuvoq. Tassani inunngortoqartarpoq, toqusartullu ilarpassui aamma tassani toqusarput. Ilaat annaanneqarsinnaasarput, allalli toqusussanngorlutik paasisarpaat. Peqqinnissaqarfik pillugu oqaluttuarineqartartut inuppassuarnut attuumassuteqartarput, ilaatigullu pissanganartuusarlutik. Qaammatini kingullerni arlaleriarluni taamatut pisoqartarsimavoq. Peqqinnissaqarfik tamanut ammasumik oqallissutigineqartarpoq, politikerit, napparsimasut peqatigiiffiisa, nakorsat peqqissaasut ajornartorsiuterpassuit eqqumaffigisarpaat, pingaartumillu massakkut qinersisussanngornitta nalaani.
Peqqinnissaqarfik amigaateqarneq - tassa sulisussanik aningaasanillu - pissutaalluni sakkortoorujussuarmik tatineqarnikuuvoq. Periarfissat annikilligaangata politikerit pisortallu pikkorissut sakkortuumik pingaarnersiuisariaqalersarput. Qinersisartullu tassuuna sunniuteqarsinnaapput.
Napparsimasut pisariaaqartitsisut
Ullumikkut innuttaasut nappaatigisartagaasa ilaat suliarineqartanngillat. Nunatsinni taamaallaat inuuneq annaanniaannarlugu ikiueqqaartoqartarpoq, nappaatit toqussutaasinnaasut nappaatillu pinasuartumik katsorsarneqartariaqartut kisimik katsorsarneqartarlutik.
Nappaatit kingusinnerusukkut annertuumik kinguneqarsinnaasut, soorlu siffissakkut seeqqukkullu gigtimik nappaatit, qanoq iliuuseqarfigisanngilagut. Paarlattuanilli nalunngilarput innuttaasut utoqqaanerusut ukiut 25-it tilliuttut ingerlanerini marloriaammik amerlassuseqalerumaartut, inuusuttullu ikinnerulerumaartut, taamatullu aamma inuunermik atuinikkut nappaataalersartut amerliartuinnarumaartut, inuit sukkortut, uummatip taqaasigut nappaatillit tunillatsissimasullu amerlanerulerlutik. Peqatigitillugulu peqqinnissaqarfik nappaatit ilaasa misileraataasumik katsorsarnissaannut piumaffigineqartalerpoq, naak tamakku iluaqutaasinnaanersut uppernarsineqarsimanngikkaluartoq.
Qanoq taamaattoqarsinnaava?
Pissutigalugu politikerit peqqinnissap tungaatigut pingaarnersiuillutik tulleriiaarinaveersaartarmata, amerlasuuniilli tatineqalerlutillu erngerlutik kræftimik nappaatillit misileraataasumik katsorsarneqarnissaannut akuersisarput. Naak tamatuma iluaqutaasinnaanera ilisimatuussutsikkut uppernarsarneqarsimanngikkaluartoq. Peqqinnissaqarfik pisortanit ingerlanneqartoq taamatut ingerlanneqartussaanngilaq. Taamaaliorneq uungatsiaannaq isigineruvoq. Aningaasaqarneq aamma ukiumiit ukiumut iluarsiivigineqartarpoq. Naak kikkulluunniit nalunngikkaluaraat peqqinnissaqarfik umiarsuarujussuusoq, ukiut arlallit atorlugit sangutikkiartuaagassaq. Taamaattumik peqqinnissaqarfik aningaasaqarneq pillugu ukiumut arlalinnut atuuttussamik isumaqatigiissuteqarfigineqartariaqarpoq.
Nunatsinni peqqinnissaqarfimmut politikikkut oqartussaaffik politikerinit tigummineqarpoq. Politikikkut pingaarnersiuilluni tulleriiaarisoqartariaqarpoq, suliassat suut suliarineqartarnissaat taakkulu qanoq aningaasalersorneqartarnissaat politikerit oqartussaaffigimmassuk. Nuannarigutsigu nuannarinngikkutsiguluunniit napparsimasut aningaasallu ataatsimoortillugit eqqartortariaqarpagut. Siffissamikkut suliaritittussat isimikkut pilattartittussaniit pingaarnerutittassavagut? Imaluunniit eqqarsartaatsimikkut nappaatillit pingaarnerutissavagut? Immaqaluunniit kræftimik nappaatillit?
* Aningaasat qanoq amerlatigisut tamatta peqqinnissaqarfitsinnut atorumavagut?
* Suliassat suut peqqinnissaqarfiup isumagissavai?
* Assigiinngitsunik nappaatillit inuilluunniit ataasiakkaat pineqartillugit suut tunngavigalugit nalilersuisassaagut?
Suli pitsaanerusumik
Peqqinnissaqarfiulli aningaasanik suli amerlanerusunik aningaasaliiffigineqartariaqarnera politikerit paasisariaqarpaat - pinaveersaartitsineq pitsaaneruleqqullugu, katsorsarneqartartut amerlaneruleqqullugit katsorsaasarnerlu suli pitsaaneruleqqullugu.
Inuit peqqinnissaqarfimmi sulisut anguniagassat pingaarnerit suunerinik politikerit erseqqissumik nalunaaruteqarnissaat kissaatigisarpaat. Nunatsinni peqqinnissaqarfik politkerit akisussaaffigaat. Tamattali - innuttaasut, peqqinnissaqarfimmi sulisut aalajangiisartullu - peqqinnissaqarfiup anguniagassai tamakkulu qanoq iliorluni anguneqarnissaat oqallisigisariaqarpagut. Taamaattumik peqqinnissaqarfik isumaliutifeqqissaartariaqarparput, ullumikkutut nalaatsornerinnakkut aaqqiisarneq piunnaarlugu siunertalimmik ingerlanissaa qularnaarumallugu. Inuiaqatigiinni allanngornernik pisoqartussanngorpoq, massakkullu - junip appaanni - politikerinik silatuunik, silassorissunik akisussaassusilinnillu, pisariaqartunik aalajangiinissaminnut pisinnaassuseqarlutillu sapissusilinnik qinersinissatsinnut periarfissaqarpugut.
Qanoq qinersinissarput siunissami atugarissaarnissatsinnut attuumassuteqarpoq.
Qinersilluarisi!