Inuussutini pingaarnerutitaq: Naalakkersuisut Kalaallit Nunaata pitsaanerpaamik iluanaaruteqarnissaa qularnaartariaqarpaat
NUSUKAp tungaaniit siullermik aningaasaqarnermut nunanullu allanut tunngasunut naalakkersuisunngortoq tikilluaqquniarparput.
Aningaasanut Inatsisissami pingaarnerit inissinneqareersimasut suliassamik tigusissalluni ajornaannerpaajusanngilaq. Oqimaaqatigiissaariumalluni annertuumik suliumassuseqartariaqarpoq, allatullu ajornartumik isummanik naapeqatigiissitsisariaqartassalluni.
Per Berthelsenili oqartuartarpoq: siumut isigisariaqarpugut. Aningaasanullu inatsisissaq tigusaa eqqarsaatigalugu, siumut isigeqqissaartariaqarpoq aammalu nunatsinnut inuinullu pitsaanerpaasussanik nassaarniartariaqarluni.
Naalakkersuisut aluminiup, aammalumi aatsitassanik uuliamillu ujaasinerit pitsaanerpamik iluanaarutigineqarnissaat qularnaartariaqarpaat. Naalakkersuisut suliffeqarfissuit, annersaat nunatsinni kaaviiaartinneqartartuniit amerlanerusunik kaaviiaartitaqartartut isumaqatiginiartartussaavaat.
Imaanngilarli uagut inuiattut suliffeqarfissuit tamakkua naalakattaaginnartassagigut.
Uagut nunatsinni pilersitassanut sinaakkusiisartussaallutalu piumasaqaateqartartussaavugut. Isumaqarpugullu tamakkununnga naalakattaaginnarasilu niuertuusuusaarfigisssanngikkisi. Piumasarisiuk uagut qanoq ililluta akileraarutit akitsuutillu aqqutigalugit taakku qanoq pitsaanerpaamik inooqatigissanerigut. »Raajanut akitsuummisuulli« kukkuluttoqqeqinasi.
Neriuppugut aningaasaqarnermut nunanullu allanut tunngasunut naalakkersuisunngortup paasisimassagaa, inuussutissarsiornerip pitsaasunik tatiginartunillu sinaakkutassaqarnissaa qanoq pingaaruteqartiginersoq. Inuussutissarsiornerup immikkoortui tamarluinnangajammik annertuunik unammilligassaqalersussaapput. Sanaartornermi suliassat 1/3-iinnaalluunniit suliffeqarfinnut nunatta avataaniittunut tutsinneqassappata tamanna isumakulunnartunik pilersitsisussaavoq. Manna tikillugu ukiumoortumik aningaasanut inatsisiliortoqartarsimavoq. Tamatta angerlarsimaffitsinni missingersuusiatta kattunnerattut isigineqarsinnaasumik.
Unammilligassarpassuanngortussat eqqarsaatigalugit naalakkersuisut aningaasaqarnermut politikeqartariaqalerput. Siunissaq ungasissoq eqqarsaatigalugu anguniagassat - allanngortinneqarsinnaanngitsutut aalajangeriigaanngitsut - pisariaqartippagut. Nuna namminiilingajalersoq namminersulivinnissaminullu ingerlasoq landskarsip ukiumiit ukiumut oqimaaqatigiissinniartarnera kisiat tunngavigalugu ingerlasinnaanngilaq. Aammalumi ukiut tamaasa taamaaliortarnissaq avaanngunartuusussaavoq.
?Nalit ukiumiit ukiumut qaffariaatigisartagaat aningasaqarneruleriartornissatsinnut tunngavigisassagut ineriartissinnaajumallugit aningaasaqarninnguarput immikkoortitaartumik ingerlatsivinngortikkiartuaarniartigu.
Sulisussaaleqisarneq ullumikkumiit annerulersinnaveersaarumallugu ilinniartitaanermut silatusaartumik aningaasaliisarneq ingerlattuarniartigu. Katataasoqannginnissaalu pillugu katataalersimasut angummatsinniarlugit sukataarnerulerniarta.
NUSUKA aningaasaqarnermut nunanullu allanut tunngasunut naalakkersuisunngortup suleqatiginissaa qilanaaraa. Uagut matorput ammajuaannarpoq.
Sermitsiap aningaasaqarnermut nunanullu allanut tunngasunut nutaamik naalakkersuisunngortoqarnera tunngavigalugu inuussutissarsiornikkut ingerlatsivisiit assigiinngitsut tassuunakkut politikkissamut kissaatigisaminnik saqqummiusseqqullugit qinnuigisimavai. Una allaaserisat aappassaraat. Kalaallit Nunaanni Sulisitsisut Peqatigiiffiat (GA) siulliulluni oktoberip pingajuanni Sermitsiakkut saqqummiussivoq.