Inuussutini pingaarnerutitaq: Peqquserlunnermut nakkutilliisunik pilersitsisoqassaq
Kattuffiup nutaap Kalaallit Nunaanni peqquserlunnerup qanigisanillu salliutitsinerup pitsaaliornissaat sammissavaa.
CSR Greenlandip aamma Kalaallit Nunaanni Sulisitsisut Peqatigiiffiata sulissutigaat Transperancy Internationalip nunatsinni immikkoortortaqalernissaa. Taanna kattuffiit nunarsuarmi piumassutsiminnik ingerlanneqartut annersaraat, ammasuunissamik peqquserlunnerillu akiorniarlugit sorsuutiginnittoq.
Transparancy International (TI) nunat immikkoortuini, Chapters-inik taaneqartartuni, aaqqissuussaavoq ileqqorluttumik niueriaatsimik, peqquserlunnermik qanigisanillu salliutitsiniarnernik nakkutilliisunik. Suliniuteqarfiugajupput peqquserlunneq pillugu paasissutissiineq tamatumalu qanoq akiorniarnissaa, pisortanik oqaloqatiginnittarneq kiisalu arlaannut attuumassuteqanngitsunik misissuinerni ataqatigiissaarineq. Tamatuma saniatigut TI pingaaruteqarsinnaavoq ilinniartitsinermi tusagassiorfinnullu atatillugu. Nunami immikkoortortaqarfiup Chapterip sammisassat pingaarnersiortassavai.
Sooq TI Kalaallit Nunaanni?
Kalaallit Nunaanni aningaasaqarnerup katitigaanera annertuumik allanngortussaavoq, ilaatigut aatsitassarsiornissanut atatillugu. TI-p nunarsuarmi tamarmi misissuisarnerisa takutippaat inuussutissarsiortutut immikkoortoqarfinni soorlu pisortat sanaartortitsineranni, uuliamik qalluinermi aatsitassarsiorfimmillu ingerlatsinermi peqquserluttoqarnissaanik ulorianartorsiorfiunersaasut. Taamaattumik pingaaruteqarpoq inuiaqatigiittut ulorianartorsiornerup tamassuma pakkersimaarnissaanut piareersimanissarput. Taamaattumik anguniagaanngilaq Kalaallit Nunaanni qanigisanik salliutitsisarnernik kammalaatersornernillu siusinnerusukkut oqallinnerit nanginneqarnissaat, taamaallaalli siumut isiginiarnissaq tamakkua pinngitsoorniarlugit.
Tunngaviusumik pineqarpoq aningaasarsiornikkut siuariartorneq inuiaqatigiinnut tamarmiusunut iluaqutaassasoq, FN-ilu malillugu peqquserlunnerit aningaasarsiornerup siuariartortinnissaanut aporfissat annersaraat. Tamanna Kalaallit Nunaanni pitsaanerpaamik pinngitsoorsinnaavarput tamatuminnga ilisimasaqarnerup annertusineratigut. Erseqqissarneqassaaq maana Kalaallit Nunaanni ingerlatsisut pasillissallugit tunngavissaqanngilluinnarmat, suliniulli taamaallaat isigineqassaaq kissaatigineqarmat Transparancy Internationalimi sinniisoqarnissaq, nunat kitaamiut allat assigalugit.
Inuussutissarsiortut kattuffiillu annertuumik tapersiipput
Maannakkorpiaq malinnaasoqatigiinnik piginnaasalinnik katiterinissaq sulissutigineqarpoq Kalaallit Nunaanni immikkoortoqarfimmik ineriartortitseqataasussamik. Tamatuma saniatigut aningaasaleeqataasussanik pisariaqartitsisoqarpoq misissuinissamut, tassani periuseq nunani tamalaani akulerineqartoq atorlugu qitiusumik ingerlatsivinni innarligassaannginnerup annertussusaa misissorneqassalluni. Misissuineq 250.000 koruunit missaannik akeqarpoq, taannalu aningaasalerneqassaaq kattuffinnit, ingerlatsivinnit inunnillu ataasiakkaanit piumassutsimik aningaasaliissutinik, naatsorsuutigineqarporlu misissuinerup inernera saqqummiunneqarsinnaassasoq Kalaallit Nunaanni Transparancy Internationalip pilersinneqarnera ilutigalugu.
Finansforbundetip SIK-llu pilersitsinissaq misissuinissarlu tapersersorusoreerpaat, soorluttaaq ingerlatsiviit inuillu ataasiakkaat arlallit peqataajumallutik nalunaarsimasut.
Transparancy International pillugu uani atuarsinnaavutit: www.transparancy.org