Inuussutini pingaarnerutitaq: Siunissamut tikilluarit
Inatsisartut attaveqaatitigut angallannikkulu ataatsimiititaliaata siulittaasuata, Godmand Rasmussen-ip qarasaasiat atorlugit attaveqaatinik atuinermi akileeriaaseq flatrate atorlugu akiliisalernissaq pillugu Qanorooq-mut oqaaseqaatai assorsuaq pakatsinarput.
Ataatsimiititaliap siulittaasua ineriartornermut malinnaasinneqarsimanngeqisoq oqarpoq inuit qarasaasiatigut attaveqaatinik internet-imik atuivallaanngitsut internet-imik killeqanngiusartumik ingasattajaartumillu atuisutut akiliisaleratarsinnaannerat ernummatigalugu.
Siulittaasup eqqarsaatigisariaqaraluarpaa periarfissap ataatsip atorneratigut periarfissaq alla mattunneqanngimmat. Tassami silarsuarmi qarasaasiatigut attaveqaatinik atuinermi akileeriaatsimi flatrate kiisalu atuinerup annertussusaa naapertorlugu akiliisinnaanerup ataatsikkut atorneqarsinnaanissaat periarfissaqarmat.
Taamaaliorneruttaaq kingunerissavaa atuisut ataasiakkaat kiisalu inuiaqatigiit iluaquserneqarsinnaammata, tassami soorlu ilinniartitaaneq eqqarsaatigalugu ilinniartitaanikkut qaffassaanissami paasissutissat pisariaqartinneqartut killeqanngiusartut qarasaasiatigut attaveqaatitigut pissarsiarineqarsinnaammata.
Godmand Rasmussen-ip oqaaseqaateqarnerani annilaarnartoq tassa, qarasaasiatigut attaveqaatit silinnerusunngortinneqarnerat akileeriaatsillu flatratip atulernissaa ilinniartitaanikkut ingerlanermut, peqqinnissaqarnermi ingerlanermut soorunalimi inuutissarsiornermut tamarmut qanoq iluaqutaatigilersinnaanersoq takusinnaanngimmagu.
Ilinniartitaanermi qarasaasiatigut attaveqaatinik atuinerup annertusarneqarnera periarfissarpassuarnik ammaassisussaavoq. Assersuutigalugu ungasissumut ilinniartitsineq ullumikkorniit pitsaanerujussuarmik eqaannerujussuarmillu ingerlanneqalersinnaagaluarpoq.
Soorunalimi Telemedicin-imik atuineq aammattaaq pitsaanerulersinneqassagaluarpoq.
Ilinniartitaanermi qarasaasiatigut attaveqaatitigut atortorissaarut siunissamut isigisoq ATTAT, pitsaasumik ineriartornissamut pisariaqartinneqartoq flatratip atulerneratigut
pigiinnarneqarsinnaalissagaluarpoq. Suliffeqarfiup akileraarutit akilereerlugit ukiumut 100 millioner kr. sinnerlugit sinneqartooruteqartup aningaasartuutiminik millisaaniarluni atortumik pitsaasumik ATTAT-mik matusinialernera uppernanngingajapporluunniit.
Inuutissarsiornermut atatillugu nunarsuarmi suliffeqarfiit assigiinngitsut ajornannginnerusumik suleqatigineqarsinnaalissapput, taamatullu qarasaasianik atortunik IT-mik atuinerni pinngitsoorneqarsinnaanngitsunik software-nik taaneqartartunik atuineq iluarsaasisarnerlu ajornannginnerulissagaluarput. Suliffeqarffiit telemik atuineranni aningaasartuutaasigut annikillisaaffiginerisigut aningaasatigut ingerlatsinermikkut imminnut nammassinnaanerulissagaluarput. Tamatumunnga aningaasartuutaasimagaluartut inerisaanermut annertusiartortitsinermullu atorneqarsinnaalissagaluarput, tamannalu inuiaqatigiinnuut iluaqutaassagaluarpoq.
Suliffeqarfiit inuillu ataasiakkaat qarasaasiatigut attaveqaammik internet-imik niuvernerminni atuinerat soorunalimi ullumikkorniit pitsaanerujussuanngortinneqartussaavoq. Qarasaasianik atuisarttut aningaasat ikinnerusut atorlugit qarasaasiani atortorissaarutit software-t attaveqaatit atorlugit aasinnaalissavaat, uffa siusinnerusukkut pisiniarfiit aqqutigalugit pisiarisaraluarlugit imaluunniit allatsitsinikkut pissarsiarisaraluarlugit. Nassiussuinikkut aningaasartuutit tamarmik sipaarneqarsinnaalisagaluarput.
Naggataatigut attaveqaatitigut angallannikkullu ataatsimiititap siulittaasua, Godmand Rasmussen kaammattorusuppara tamakkunuunatigut periarfissat isgineroqqullugit, akornutaasinnaasuinnaat isiginagit.