Inuussutissat akiisa qaffakkiartornerat oqaluuserisassanngortinneqartoq
Siumup inuussutissat nukissiuutillu akiisa qaffakkiartornerat Inatsisartuni oqaluuseritikkusuppai
Qanoq iliorluta nioqqutissat nunarsuatsinni akiisa sorsunnerup kingunerisaanik qaffakkiartupiluulernerat innuttaasunut kingunerluutaannginnerpaamik inissinniarlugu suliarisinnaavarput?
Inatsisartuni Siumut sinnerlugu ilaasortat upernaakkut ataatsimiinnermi apeqqut taanna oqaluuserisassanngortikkusuppaat.
Partiimit Ukrainermi sorsuttoqarnerata kingunerisinnaassai ernummatigineqarput:
- Ukrainemi sorsunneq tunngavigalugu akit qaffakkiartorput piffissamilu qaninnermi suli annertunerujussuarmik eqquissasoq ilisimaneqalereerpoq, partii oqallisissiaminut tunngavilersuilluni allappoq.
Partiimit innersuussutigineqarpoq, Polar Oil sillimmateqartoq, tamatumalu malitsigisaanik ikummatissamut akigititaq appasissuusoq. Tamannali taamaaginnarnavianngitsoq, Sumumit nalilerneqarpoq:
- Uuliamut akit nunatsinni qaffappata, kiassarnermut akiligassat qaffassapput, sanaartornermut akit qaffassapput aamma isorliunerusuniittut, nunaqarfinniittut, aalisartut, piniartut, pissakinnerusut ilaqutariillu meerartallit annertuumik eqqugaassapput, partii allappoq.
Siumumit aamma naatsorsuutigineqarpoq, Ruslandimut niuerneq unitsinneqarpat aningaasaqarneq eqqugaassasoq. Partiimit taamaammat politikkerit innuttaasunut ilaqutariinnullu pissakinnerusunut qanoq ikiuussinnaanersut pillugu oqallittoqarnissaa piumasarineqarpoq.
Oqarluuserisassanngortitaq pilersaarutit maajip aqqaneq-aappaani oqallisigineqassaaq.