Inuusuttoq skizofreneqartorlu unnuisarfimmiittartoq: - Qangalili ikiorserneqartussaangaluarpunga
Angut inuusuttoq ukiuni pingasuni Nuummi unnuisarfimmiittarsimavo. Skizofreneqartuuvo, pinngitsooranilu ikiorserneqartussaasoq innarluutilinnut inatsimmi allassimagaluartoq, naleqquttumik najugaqarfissaqartinneqarani.
- Unnuisarfimmi appisaluutsittarpunga, naluarali sooq.
27-nik ukiulik Karl Peter Jakobsen, Nuummiittumi Frelsens Hærimi sisamanngornermi Sermitsiaq.AG-mit apersorneqarami nuannaarpallaarani taamatut oqaluttuaroq.
Karl Peter Jakobsen illersuisuini Else Thorsen peqatigalugu oqaluttuaraa tarnikkut nappaateqartuulluni.
Skizofreneertuuvoq nakorsaatitorlunilu. Karl Peter Jakobsen innarluutilinnut inatsit naapertorlugu ikiorserneqarnissamut tapersersorneqarnissamullu pisinnaatitaaffeqarpoq - taamaakkaluartoq ukiuni kingullerni pingaasuni unnuisarfimmi najugaqapoq.
Inatsit naapertorlugu Naalakkersuisut inunnut tarnikkut nappaatilinnut timimikkulluunniit innarluutilinnut ulloq unnuarlu paaqqinnittarfinni inissaqartitsinissaq isumagisussaavaat, kommunalbestyrelsillu najugaqaqatigiiffinni aamma najugaqarfinni illersugaasuni inissat pisariaqartinneqartut naammattut pigineqarnissaat isumagisussaallugu.
Eqqissiveqanngitsupilussuusoq
Karl Peter Jakobsenip oqaluttuaraa, najugaqarfimmi inissamut allatsissimalluni, inissaqartinneqarnerlunili suli paasitinneqarsimanani. Tusagaqarnissami tungaanut - soorlu ukiuni kingullerni pingasuni - unnuisarfimmi sinittarsimalluni, tamatigulli tamanna ajornaatsuinnaasanngitsoq oqaatigalugu.
- Piffissami matumani eqqissiveqannginnera pissutigalugu appisaluutsittarunarpunga, Karl Peter Jakobsen angerlarsimaffeqanngitsut allat innersuussutigalugit oqarpoq.
Else Thorsen ilanngussilluni oqarpoq:
- Uniffeqanngitsupilussuusarpoq. Sinilerneq ajulersarpoq sinippiartaranilu.
Karl Peter Jakobsen niaqquminik anngaavoq.
- Nammineq ineqartuunguma pitsaanerpaassangaluarpoq, taanna oqarpoq.
Naakkinartaqisut
Unnuisarfimmik atuisartut allat Frelsens Hærimiittartut toqqissisimasanngillat.
Nathanael Münch Frelsens Hærimi korpslederiusoq taamatut oqaluttuarpoq.
Taassuma nassuiaatiga unnuisarfimmi tarnikkut nappaatillit aamma unnuisarfigisartagaanni aaqqiagiinngittoqartarnera tusartarlugu.
Palle Sandgreenip angerlarsimaffeqanngitsuusup unnuisarfimmilu unnuisartup tamanna ilisarisinnaanerarpaa. Ulluinnarni unnuisarfimmiittarnermini tamanna ilisimasaqarfigaa, isumaqarlunilu inuit ikiorserneqartariaqartut isumassorneqartariaqartullu isumagineqartannginnamik naakkinartaqisut.
Erseqqilluinartumik assersuutissaasoq
Palle Sandreenip ilanngullugu nassuiaatigaa, tarnikkut nappaatillit pissusilersuutaat nalinginnaasumik angerlarsimaffeqanngitsunut allanut uumitsatsitsisinnaasartut.
Karl Peter Jakobsen ikiorserneqartariaqartut ilagaat. Tamanna nammineerluni aamma oqaatigaa - soorlu aamma korpslederip, illersuisup Palle Sandgreenilu taamatut oqartut.
- Nakorsaaterpassuaqarami ulloq naallugu ilatsiinnartutut pissuseqartarpoq. Tamanna soorunami peqqinnanngilaq. Aamma ulloq naallugu inuit akornanniisinneqartarnera peqqinnanngilaq. qarasaami eqqissineq ajorpoq, Nathanael Münch oqarpoq.
Korpslederip oqaatigaa, Karl Peter Jakobsen qangarsuarli ikiorserneqartariaqaraluartunut erseqqilluinnartumik assersuutissaasoq.