Inuusuttut 15-it 112-riarlutik pinerlussimasutut pasisaasut

Eqqartuussivimmut suliakkiisut annertooq Sermersuup Eqqartuussiviani junimi aallartissaq. Angutit inuusuttut 17-it 20-illu akornannik ukiullit unnerluutigineqarput unnerluussissutillu amerlanersaat nassuerutigereerlugit. Pasineqartut 2009p aamma 2014-ip akornanni allat pigisaannik tillinnernik pinerluuteqarsimasutut unnerluutigineqarpoq.

Atuaruk: Inuit 15-it ataatsikkut eqqartuunneqalersut

Suliaq eqqartuussivimmi suliarineqartussanngortoq politiinut nukippassuarnik atuiffiusimasoq junip qulinganiit junip 26-ata tungaanut Sermersuup Eqqartuussiviani suliarineqartussanngorpoq. Suliami tassani annertuumi inuusuttut 15-it pasineqarput tillinniarsimasutut, nakuusersimasutut, iserlutik tilliniarsimasutut, tillitanik atuisimasutut, ingerlatitsisinnaanermut allagaqartaqaratik biilersimasutut, unioqqutitsillutik allat angerlarsimaffiinut isersimasutut aammalu biilinik, snescooterinik umiatsianillu aallarussisimasutut.

Pinerlunniartartoqatigiiunngillat
- Inuusuttut pasilliutit amerlanersaanni ikioqatigiillutik pinerluttarsimasutut pasineqarput. Kisianni pinerlunniartartoqatigiittut imaluunniit aaqqissuussaasumik pinerlunnertut isiginngilarput. Imaannerunnguatsiarpoq ikinngutigiit ataatsimuuleraangamik pinerlunniartalersimasut, Nuup politiivini paasiniaasartuni politeeq Laila Thomassen Fleischer Sermitsiaq.AG-mut oqarpoq.

Nuup politiivini paasiniaasartut sapaatit akunneri arfinillit arfineq pingasut atorlugit suliap eqqartuussivimmut saqqummiunnissaa piareersarsimavaat. Suliat aamma politiit piffissarujussuaq atorlugu paasiniarsimavaat 2009-miit 2014-ip tungaanut.

Eqqartuussinerit Hotel Hans Egedemi pissapput unnerluunneqartullu 15-it illersuisunit arfineq marlunnit ikiorneqassapput.

- Pasineqartut unnerluussissutit amerlanersaat nassuerutigereerpaat. Sukanganerpaamik pineqaatissiissutitut piumasarput tassaavoq ukioq ataaseq qaammatillu sisamat pinerluuteqarsimasunut inissiisarfimmiittussanngortitaaneq. Unnerluutigineqartut ilaat pinerloqqissagunik pineqaatissinneqassasut aammalu pinerluuteqarsimasunik nakkulliisunit nakkutigineqarnissaat piumasaraarput. Aammattaaq inunnik isumaginninnermi oqartussaasut paasiniaaffigineqareerput inuusuttut ilaat suli ukiukimmata qanoq pisoqarsimanera eqqumaffigineqarnersoq, Laila Thomassen Fleischer oqarpoq.

Pilersaarutit malillugit eqqartuussinerit junip 26-at naammassisussaapput.