Inuusuttut ikittuinnaat inuussutissarsiornermik ilinniagaqartartut
Kisitsisit nutaat takutippaat, inuusuttut meeqqat atuarfianni atuareernerminni ukiut marluk qaangiunneranni ilinniagaqalersartut 50 prcdentit missaanniittartut. 83 procentit ilinniarnertuunngorniarfimmi ilinniagaqalersarput 17 procentillu inuussutissarsiornermik ilinniagaqalersarlutik.
Naatsorsueqqissaartarfiup saqqummersitamini kingullermi inuusuttut meeqqat atuarfianni atuareernerminni ukiut marluk qaangiunneranni qassit ilinniagaqalersarnersut qitiutillugit sammivai.
Kisitsisitigut takuneqarsinnaavoq, meeqqat atuarfiannit 2019-imi atuarunnaartut ukiut marluk qaangiunneranni 52 procentii inuusuttunut ilinniarfimmi ilinniagaqalersartut.
Kisitsitit taamaalillutik allangujaatsuupput. Naatsorsueqqissaartarfimmimmi allapput, ukiut marluk ingerlanerini inuusuttunut ilinniarfimmut ingerlaqqittartut amerlassusaat 50 procentit missaaniittartoq.
- Atuartut amerlanersaat, 83 procentiinik annertutigisut, ilinniarnertuunngorniarnermik aallartitsisimapput 17 procentiilu inuussutissarsiornermi ilinniarnermik aallartitsisimallutik, Naatsorsueqqissaartarfimmit allapput.
Takussutissiami tulliuttumi 2010-mi soraarummeersimasut ilinniagaqqilersimasut amerlassusaat:
Nukappiaqqat niviarsiaqqallu ilinniagassamik toqqaasarnerat assigiinngissuteqalaarpoq, niviarsiaqqallu nukappiaqqanut sanilliullugit amerlanerit 2019-imi meeqqat atuarfiata naammassereernerani ilinniagaqalersimallutik.
- 2019-imi meeqqat atuarfiata naammassereernerani niviarsiaqqat 58 procentii ilinniakkanut ingerlatsipput, nukappiaqqat 46 procentii ingerlatsillutik. 2010-mili taamatut ingerlasimapput, Naatsorsueqqissaartarfimmit allapput.
Kommunimiit kommunimut assigiinngissuseqartut
Kisitsisitigut aamma takuneqarsinnaavoq, niviarsiaqqat 53 procentii pingaartumik ilinniarnertuunngorniarnermik toqqaasartut, ikinnerusullu 6 procentiusut inuussutissarsiornermi ilinniakkamik aallartitsisartut.
- Nukappiaqqat akornanni amerlanerusut (34 pct.-it) aamma ilinniarnertuunngorniarnermik aallartitsisimapput. Ikinnerusulli (12 pct.-it) inuussutissarsiornermi ilinniakkamik aallartitsisimallutik, Naatsorsueqqissaartarfimmit allapput.
Kommunini ilinniagaqalersartut aamma assigiinngissuseqarput. Qeqqata kommuniani inuusuttut ilinniarfiini ilinniartoqarnerpaasarpoq, tamannalumi takussutissiami tulliuttumi takuneqarsinnaavoq:
