Inuusuttut innarluuteqartut oqariartuutaat Tiliup saqqummiukkai
Inuit innarluuteqartut pisinnaatitaaffii sapaatip akunnerani 41-mi malunnartinniarneqartarnerannut atatillugu Tiliup inuusuttut oqariartuutai saqqummiuppai. Tiliup Norge maligassaalluartutut aamma taavaa.
Inuit innarluutillit pisinnaatitaaffeqarneri sapaatip akunnera 41-mi malunnartinniartarmat, Tilioq malunnartitsilluni inuusuttut pisinnaatitaaffitsik pillugit oqariartuutaanik saqqummersitsivoq.
Inuit innarluutillit pillugit sullissiviup inuusuttut innarluuteqartut isumaat oqariartuutaallu Facebookimini sapaatip akunnerani uani saqqummiuttaarpai. Qulequtarineqarpoq "tulluusimaarneq aamma nukittuneq", pisinnaatitaaffiillu pillugit ukkatarinnittoqarnerulernissaanik siunertaqarluni.
Oqariartuutit ilaat Tiliup siammartigaa tassaavoq:
- Nunatsinni sullissineq ajunnginnerusinnaasoq, ikorfartortit nunatsinni ajornarput, akunnerillu sullissinissaannut tunniunneqartartut (namminerisamik inuuneqarsinnaatitaanermut naleqqunnatik) ikippallaarput. Assersuutitut tappiitsoq ullormut akunnerit marluk ikorfartorteqartarpoq, tamakku pitsanngorsarneqartariaqarput, Ellen Møller, kalaallit inuusuttut innarluuteqartut peqatigiiffianni, KIIP-imi siulittaasoq oqarpoq.
Ingerlaaqatigiinnermi peqataasut
Tilioq ilanngullugu ilisimatitsivoq oqariartuutigineqartut Norgemi Disability Pridemi, aamma tulluusimaarluni ingerlaaqatigiinnermik taaneqartartumi, majimi 2022-mi oqariartuutigineqareersimasut.
Tiliup peqataatitaasa maluginiarsimavaat angallassinermi pisortallu illuutaanni tikikkuminassuseq Norgemi eqqummaariffigineqartoq.
- Umiarsuarmik angallat tamanit ilaaffigineqarsinnaasoq misilipparput. Kaassuartakkamik issiavimmik atuisut ilaasinnaallutik. Naleqqussaasimanerit taamaatut nunatsinni pisariaqarput. Pisortat, unnuisarfiit tamanullu orninneqarsinnaasutut sanaartukkat Oslomi aqqusaakkavut iseruminartuupput, nuannaartunaqaat, Ellen Møller oqarpoq.
Inuit innarluuteqartut sapaatip akunnerititaani illoqarfiit ilaat immikkut sammisaqartitsipput. Narsami ullut tamaasa sammisassaqartitsisoqarpoq. Nuummilu tusilartuuneq pillugu Nuuk lokalmuseum arfininngorpat aamma oqalugiartitsissalluni.