Inuusuttut nalunaarsorneqanngitsut sulilersinneqassapput
Inuusuttut amerlanerusut sulilernissaat pillugit siunnersuut, Inatsisartut marlunngornermi aappassaaniissavaat. Tassani inuusuttut sulilertinneqarnissaat ukkatarineqassaaq, pingaartumik pisortat avataanni inissisimasut.
Ukioqatigiinni 16-25-nik ukiulinni innuttaasut 322-t pisortat avataanniipput.
Tassa imaappoq, ilinniagaqanngillat imaluunniit suliffissaaleqisutut nalunaarsorneqanngillat, aamma pisortanit ikiorsiissutinik pisartagaqanngillat.
Ukioqatigiit isiginiarneqanngitsut
Inuusuttut taakku 322-t ilaatigut suliffeqarfimmut ilanngunneqarnissaat pillugu siunnersuut, Inatsisartut ullumi marlunngornermi aappassaaneerpaat. Ilaqutariinnut Peqqissutsimullu Ataatsimiititaliap ukioqatigiit arajutsineqartut iliuuseqarfiginiarpaat.
- Innuttaasunut pisussaaffigalugu iliuusissatut pilersaarummik suliaqarnissaq inatsisip qulakkiissavaa, inuusuttunilli sullinniakkanik ujartorlugit siunertalimmik sulilersinnissaannut inuiaqatigiinnilu tapertaalernissaannut qulakkeerisoqassasoq ataatsimiititaliaq naliliivoq, tamanna atuarneqarsinnaavoq.
Ujartuilluni siunnersuinissaq pingaartumillu nassuiaasiornissamik imaluunniit inuusuttut ilinniagaqalerniarnerminnut imaluunniit suliffittaarnissaminnut akornutaasumik peqqissutsimikkut ajornartorsiuteqarnersut pillugu nassuiaasiornissaq imaluunniit katsorsaanissaq siunertaralugu qulaajaasoqarnissaanik inuusuttut sullinniakkat kikkuuneri paasiniarlugu Majoriaq ataavartumik attavigineqartartoq akissuteqaammi aamma atuarneqarsinnaavoq.
- Majoriaqarfiunngitsuni ilitsersuisarneq Innuttaasut Kiffartuussivianniit imaluunniit oqarasuaatikkut saaffiginninnikkut isumagineqartarpoq, tamanna oqaatigineqarpoq.
Iliuusissatut pilersaarutit
Inuusuttunut sulilernissamut piareersimasut suliffissarsiortutut nalunaartunut, iliuusissatut pilersaarusiortoqassaaq, suliffissarsiortutut nalunaarnerup sapaatip-akunneri sisamat qaangiunneranni:
- Iliuusissatut pilersaarummi ilanngunneqassapput, matumani ilanngullugit ilaqutariinnut, ineqarnermut tunngasut allallu paasissutissat imminermut tunngasut allaaserineqarneri.
Inuusuttunut sulilersinnaanngitsunut imaluunniit ilinnialersinnaanngitsunut iliuusissatut pilersaarummik ataavartumik nalilersorneqartussamik suliaqartoqassaaq.
- Qaammatit 12-it qaangiuppata pisortanit ikiorsiissutinik pisartagaqartoq pisartagaqarnini ingerlatiinnassaneraa imaluunniit assersuutigalugu siusinaartumik pensionisaqalernissamut qinnuteqarnissaa tigussaasumik.
Nunatta karsiani 17. mio.-t
Siunnersuut nunatta karsianut 17 millioninik akeqassaaq, akileraarutitigut isertitat 5 millionit koruuniunissaat nalilerneqarluni.
Ataatsimiititaliami amerlanerussuteqartut siunnersuut akuerineqartussatut suliakkiummagu, Naalakkersuisut nuannaarutigaat.
- Tamanna isumaqassaaq, inuiaqatigiit tamaasa isigalugit innuttaasut amerlanerusut tapersersuisuinnaassasut, taamaasillunilu innuttaasut pisortanit pilersorneqarnermik pisariaqartitsisut amerlassusaat ikilisissalluni, kiisalu kalluarneqartunut ilaqutaasunullu inuuneq naleqarnerulerluni.