Inuusuttut pingasut hashimik eqqussuisutut unnerluutigineqarput
Hashimik eqqussuinermut tunngasoq angummut arnanullu marlunnut 20-t sinnerlugit ukiulinnut Sermersuup eqqartuussiviani unnerluutigineqarluni ulluni makkunani suliarineqarpoq.
Hashimik allanut tunniussinissamik siunertaqarluni eqqussuinermut tunngatillugu suliami annertuumi unnerluussisussaatitaasup angut arnarlu ukiut marluk qaammatillu arfinillit inissiisarfimmiittussanngornissaat piumasaraa, arnarlu ataaseq ukiuni pingasuni pineqaatissinneqarsimasunut inissiisarfimmiittussanngortissallugu piumasaralugu.
Sermersuup Eqqartuussiviani suliaq ulluni makkunani suliarineqarpoq, tallimanngorpallu februaarip 16-ianni naammassineqarnissaa naatsorsuutigineqarluni.
Hashimik eqqussuinermut suleqatigiinneq
Suliami hashimik katillugit 14 kilot sinneqartumik Kalaallit Nunaannut eqqussiniarneq. Eqqussinermi hashi inunnut allanut tunniunneqartussatut siunertaasimavoq.
Unnerluussut naapertorlugu inuit pingasut siorna marsip naaneranit apriilip aallartinneranut hashimik eqqussiniarnermik suliaqarsimapput.
Unnerluussut naapertorlugu angut unnerluutigineqartoq Danmarkimiit Kalaallit Nunaannut angalanermini hashimik tigummiaqarluni politiinit marsip 22-ani 2023-mi tigusarineqarpoq.
Pigisat arsaarinnissutigineqartut arlallit
Arnat marluk apriilip arfineq-pingajuanni politiinit tigusarineqarput. Eqqartuussinermi uppernarsaatit naapertorlugit suliami arlallit ilisimannittuupput. Unnerluussut naapertorlugu arnat marluk 4 kilo sinnerlugu hashimik nassataqarlutik Danmarkimiit angalasimasut paasineqaramik, Kangerlussuarmi politiinit tigummigallarneqarsimapput.
Unnerluutigineqartut pineqaatissinneqarsimasunut inissiisarfimmiittussanngortinneqarnissaata saniatigut eqqartuussinermi aningaasartuutinik akiliissasut kiisalu pigisanik arlaqartut, soorlu iPhonet arlallit, puussiat silaannaartakkat, silaannaartitsinermut maskiina, oqimaalutaatit digitaliusut hashilu arsaarinnissutaassasut unnerluussisussaatitaasut piumasaraat.