Inuusuttut seximik atornerluisarnerup paqumigisaanera qaangerniarpaat
Inuusuttut Issittumi tamaneersut meeqqanik inuusuttunillu kinguaassiutitigut atornerluisarneq oqallisiginiarpaat.
ICC-ip inuusuttaasa suleqatigiiffiat ICYC (Inuit Circumpolar Youth) qaammatip tulliani Katuami ulluni marlunnik sivisussusilimmik aaqqissuussissaaq, tassani meeqqanik inussuttunillu kinguaassiutitigut atornerluisarnermik pitsaaliuineq pillugu paasititsiniaasoqarlunilu pingaarnertut qulequtarineqassaaq.
- Oqallitsitsinermik pilersitsiniarpugut, meeqqanik inuusuttunillu kinguaassiutitigut atornerluisarnerup taamaalilluni paqumigisaajuaannarunnaarnissaa anguniarlugu, Stina Berthensen ICYC-meersoq oqarpoq.
Ulloq siulleq sulisunut ulluinnarni meeqqanik inuusuttunillu suliaqartuusinut tamanut matoqqasumik ataatsimiiffiussaaq. Taakkua ajornartorsiummik pitsaaliuinermi qanoq ilillutik pitsaanerulersinnaanissartik oqaluuserissavaat.
Ullut aappassaat tamanut ammasuussaaq, aammalu pineqartoq pillugu immikkut ilisimasalimmit oqalugiartoqassalluni.
Isiginnaartitsisoqassaaq filmilu piviusulersaarut immikkut pisussamut filmiliarineqarsimasoq takutinneqassalluni, aammalu meeqqanik inuusuttunillu kinguaassiutitigut atornerluisarnermik pitsaaliuineq pingaarnertut qulequtaralugu.
Ulloq ammasumik oqallitsitsinermik naggaserneqassaaq.
Aaqqissuussineq Nuuummi Katuami marsip 13-iani 14-ianilu ingerlanneqassaaq.