Inuusuttut siulittaasuat qinigassanngortittoq
Kiinaq nutaaq Demokraatit folketingimut qinigassanngortippaat.
23-nik ukiulik Eva Marie Petersen, Demokraatit Inuusuttaanni siulittaasoq, folketingimut qinersinissamut marlunngornermi novembarip 12-ani pisussamut qinigassanngortippoq. Taassuma qinigassanngorteqatigai inatsisartunut ilaasortat Palle Christiansen, Jens B. Frederiksen aamma Astrid Fleischer Rex.
Demokraatit qiniqqusaarutiginiarpaat silap allanngoriartornera, hashimik atornerluinerup akiorneqarnera, ilinniagaqartut Danmarkimi najugallit atugaat kiisalu namminiilivinnissaq (selvstændighed).
Demokraatit qinigassanngortitaasa qularinngilaat partiip tamatumuuna Christiansborgimut isertitaqarnissaa.
- Qinersineq una tassaassaaq Demokraatit kiisami isertitaqarfiat, siulittaasup tullia Palle Christiansen tusagassiortunut pingasunngornermi ualikkut oqarpoq.
Folketingimi Demokraatit Konservativinik suleqateqarnertik nanginniarpaat. Palle Christiansenip takorloorpaa naalakkersuisut nutaat ima katiterneqassasut: Venstre, Konservative, Savalimmiuniit Folkeflokken kiisalu Demokraatit namminneq.