Inuusuttut umiatsiaaqqamik angalasut maqaasineqartut ujarneqarnerat iluatsittoq
Inuusuttut sisamat Narsamiit ataasinngormat puisinniarlutik aallarput. Inuusuttut aallarneranniit akunnerpassuit qaangiuttut ataataasup paasigamiuk oqarasuaataallu attaveqanngimmata ernumalerluni politiinut attaveqarpoq.
Naqqiut: Allaaserisami aallaqqaammut umiatsaaqqamik Narsarsuarmit aallartut inuit pingasuunerarneqarput. Inuit sisamat Narsamit aallarsimapput (aaqq.)
Kalaallit Nunaanni Politiit ataasinngornermi unnukkut nal. 23.21 ataataasumit ernumasumit nalunaarfigineqarput. Taassuma pania inuusuttuaraq ikinngutini pingasut ilagalugit Narsamiit puisinniarlutik ataasinngornermi nal. 14.00 aallarsimapput.
Umiatsiaaqqamik inuusuttunillu ujaasineq aallartippoq, taakku VHF radiomik imaluunniit attaveqaatinik allanik nassataqarsimanngillat.
Taamaattumillu attaveqarfigineqarsinnaanngillat imaluunniit sumiissusersineqarsinnaanatik, taamaammallu ujaasiffigineqartoq annertuvoq.
AKO, politiit aamma kajumissutsimik peqataasut ujaasipput
Narsamit kajumissutsimik ujaaseqataasut umiatsiaaqqaminnit gummibådinillu ujaasiartorlutik avalapput. Issittumi Sakkutooqarfiup umiarsuaq alapernaarsuut Ejnar Mikkelsen ujaasitippaa, Qaqortumilu politiit angallataat Nukik marlunnik politiinik inuttalerlugu avalatsinneqarpoq.
Nalunaaruteqartoqarneranit akunnerit tallimat qaangiuttut inuusuttut ajunngitsut nanineqarsimasut nalunaarutigineqarpoq.
Inuusuttut taakku kajumissutsimik ujaasisunit nassaarineqarput. Inuusuttut Narsamut angallanneqarput, tassanilu ilaqutaasut utaqqipput.
Orsueruttoorsimapput
Taakku orsueruttoorsimasut paasinarsivoq, VHF-eqannginnamik imaluunniit allanik attaveqaateqannginnamik ikiortissarsiorsinnaasimanngillat.
Inuusuttut ajoratik angerlarmata politiit nuannaarutigaat, kisianni aamma ajorluinnartumik kinguneqarsinnaasoq maluginiaqquaat.
Kalaallit Nunaanni Politiit aammaarlutik angalaalernermi siunnersuutitsialaat makku eqqaamaqquaat:
- Attaveqarniarnermut atortunik atorsinnaasunik nassataqartuarnissaq. VHF, sattelittelefon, GPS, kiisalu orsussaq naammattoq.
- Angerlamut apuussinnaanngeriasaarnissamut taquarnissaq, minnerunngitsumillu atisat oqortut atisassamaatillu.
- Puttaqutit/atallaat annanniutit, qaammartartoq, ajunaalernermut kalerrisaarutit taartumi ujaarineqarnermi takuneqarsinnaasut
- Angalannginnermi silassamut ilimasaarutip misissorneqarnissaa. Qaqugukkut avalanniarnerlutik ilaquttatit, ikinngutitit imaluunniit ilisarisimasatit oqarfigiuaannakkit, sukkut angalanissat pilersaarutiginerlugu aamma qaqugu tikinnissat naatsorsuutiginerlugu oqaatigalugit.