ISI: Isigiarsuttunut ikiorsiissutit qiviarneqarnissaat pisariaqarpoq
ISI-mi siulittaasup tulliata meeqqat inuusuttullu tappiitsut sumiginnarneqartarnerat narrutsaatigaa. Suliniutit amigaataapput, meeqqallu atuarnerminni ikiorsiissutinik tunineqarneq ajorput.
Sooq ajornartorsiut pimoorunneqanngila?
Tappiitsut isigiarsuttullu peqatigiiffianni ISI-mi siulittaasup tullia, Hans Peter Larsen, taama aperivoq.
Inatsisartunut ilaasortap meeqqanut inuusuttunullu tappiitsunut tapiissuteqarneq pillugu suli akissuteqarfigineqannginnera saqqummiunneqareersorlu, pisinnaatitaaffiit pillugit suliniaqatigiiffik Tilioq peqatigalugu peqatigiiffik taama aperivoq.
Atassutip siulittaasua Aqqalu Jerimiassen 2023-mi novembarip 28-ani paragraf 37 naapertorlugu Naalakkersuisumut akisussaasumut Aqqaluaq B. Egedemut (IA) apeqquteqarpoq, meeqqat inuusuttullu tappiitsut atuarfimmi ilinniakkaminnilu ikiorserneqarnissaannut Naalakkersuisut qanoq pilersaaruteqarnersut paaserusullugu.
Ulloq manna ullorsiutini allassimavoq marsip tallimaanni 2024, tassa apeqqutit nassiunneqarnerannit qaammatit pingasut qaangiutereerput, sulilu akissutisisoqanngilaq.
Suleqatigiinneq taamaatinneqarpoq
- Kalaallit Nunaanni tappiitsut aamma isigiarsuttut peqatigiiffiat, ISI, naapertorlugu, meeqqat atuarfianni meeqqat 17-it pisariaqartitaminnik siunnersorneqarneq ajorput. Tamatuma saniatigut inuusuttut arfinillit 18-21-illu akornanni ukiullit siunnersorneqarusuttut siunnersorneqanngillat, taama oqarpoq ISI-mi siulittaasup tullia Hans Peter Larsen.
Siornatigut Refsnæs Synscenter inuusuttunut isiginiarnikkut innarluuteqartunut immikkut siunnersuisarsimavoq, Naalakkersuisullu isumaqatigiissut ukiut marluk matuma siorna atorunnaarsippaat.
Tassani meeqqat inuusuttullu tappiitsut qanimut malinnaavigineqarnissaannik aaqqissuussinermik nutaamik neriorsuut Hans Peter Larsenip eqqaamavaa.
- Ukiulli marluk qaangiuttut meeqqat inuusuttullu atuarfimmi pisariaqartitaannik tapersersorneqarlutillu siunnersorneqarnissaannut qulakkeerinnittussamik aaqqiissutissamik nutaamillu aaqqissuussinermik suli takusaqarsinnaanngilagut. Meeqqat siunissatsinnik taasartakkavut sumiginnarneqarnerat uggornarpoq, Hans Peter Larsen oqarpoq.
Immikkoortiterineq
Kalaallit Nunaanni isiginiarnikkut siunnersorteqanngitsoq ISI ilisimatitsivoq. Inuusuttunut isiginiarnikkut innarluuteqartunut ulluinnarni atuarfimmi qanoq pitsaanerpaamik angusaqarsinnaanerannut ilinniartitsinikkut pikkorissaanikkullu Refnæs Synscenter siusinnerusukkut immikkut siunnersuisarsimavoq. Danmarkimi Refsnæs Synscenterimit siunnersorneqartarneq ikiorsiinermut tapertaataavoq, taannalu kommunimi isiginiarnikkut siunnersortimit tunniunneqartarpoq, kisianni Kalaallit Nunaanni isiginiarnikkut siunnersortimik kommunini atorfeqartoqanngilaq.
- Kalaallit Nunaanni pineqartut ikippallaarnerannut utoqqatsissutissaanngilaq -
immikkoortitsineruvoq, taama oqarpoq Inuit innarluutillit pillugit oqaaseqartartoq Anja Hynne Nielsen nangillunilu:
- Tappiitsuugaanni, tappiitsuunngikkaanni imaluunniit tamakkiisumik
isigisaqaraanni isiginiarnikkulluunniit innarluuteqaraanni, isiginiarnikkut siunnersortit
siusinnerusumik aamma eqqortumik suliniuteqarnerat inuunermut aalajangiisuulluinnarsinnaavoq. Taamatuttaaq aamma inuunerup pitsaassusaanut, sulisinnaassusermut ilinniarsinnaassusermullu aalajangiisuulluinnarpoq. Siusinnerusukkut iliuuseqarneq sutigut tamatigut aalajangiisuulluinnarpoq. Tamatumani siunnersuineq aamma isiginiarnikkut siunnersortit immikkut ilisimasaat pingaaruteqarluinnarput. Tamanna sumiginnaaneruvoq, oqarpoq.
Tiliup ISI-llu maanna pilersaarutit nutaat piumasaraat.