Island EU-mi ilaasortanngussaaq

Islandip EU-mut ilaasortanngorsinnaanera ilimanarnerujartorpoq.

Europaministeri Nicolai Wammenip ulluni marlunni Islandimut tikeraarnini ullumi naammassivaa. Europaministerip Islandimi tikeraarnermini Islandip ministeriunera Jóhanna Sigurðardóttir, nunanut allanut ministeri Össur Skarpheðinsson, ministeriunerup tullia, nunalerinermut, aalisarnermut aningaasaqarnermullu ministeri Steingrímur Sigfússon kiisalu Altingip nunanut allanut ataatsimiititaliaa aatsimeeqatigai.

Tikeraarnerani ingammik Islandip EU-mut ilaasortanngorsinnaanera qallunaallu EU-mi siulittaasuunerat sammineqarput.

Europaministeri Nicolai Wammen Socialdemokrateineersoq oqarpoq:

- Danmarkip Islandip EU-mi ilaasortanngornissaa kissaatigaa, tassaniittariaqarput. Taamaattumik Islandip EU-mut ilaasortanngorniarluni isumaqatigiinniarnera tamakkiisumik tapersersorparput, tamannami oqaloqatiginerini upparnarsivara. EU-mi siulittaasuunitsinni aamma kissaatigaarput isumaqatigiinniarnerit sapinngisamik ingerlalluarnissaat. Tikeraarni paasigakku isumaqatigiinniarnerit ingerlalluartut naammagisimaarpara.

Læs "Europaminister gæster Island"

- Islandimiut piareersarluarsimapput sulilluarlutillu. Aamma Islandip EØS-imik ilaasortaanerata kinguneraa Islandip EU-mi malerugassat naammassereersimallugit. Tamanna nuannerpoq sinnassaataasariaqarnanili, europaministeri Nicolai Wammen oqarpoq.

- Susassaqarfinni arlalinni isumaqatigiinniarnerit ajornakusoortut ingerlanneqartussaapput, soorlu aalisarnerup iluni. Islandip EU-llu pitsaasumik isumaqatigiinniarnissaat pisariaqarpoq. Ullumikkulli Reykjavimmiit allarpunga Islandimut EU-mullu neriulluarlunga.