Island: Nunap sajunneranit ajoqusikkat akisusut
Islandimi illoqarfimmi Grindavíkimi illut attaveqaatillu ajoquserneri manna tikillugu milliartip affaanik akeqartut, Islands Naturkatastrofeforsikringimi direktøri oqarpoq.
Illoqarfimmi Grindavíki innuttaasut ulloq 10. november qimigussuutsinneqartut immaqa qangatut isikkoqaqqinnavianngilaq, oqartussammi illoqarfimmut uteqqinnissaq isummannaalleqqippat illoqarfiup qanoq sanaqqinneqarnissaa nalilissavaat.
- Illoqarfiup ilusilersorneqarnerata arlaatigut allanngornissaa avaqqunneqarsinnaanngitsoq isumaqarpunga, Hulda Ragnheiður Árnadóttir, Islands Naturkatastrofeforsikringimi direktøri, Iceland Review naapertorlugu oqarpoq.
Siunissaq qularnaateqartoq
Illut 230 ajoqusersimanerannik nalunaarutinik tigusaqartoqarpoq, mannalu tikillugu 140-t takuniarneqarput.
Maannakkut piffiit suut najugaqarfigineqarnissaminnut naleqquttuunerat suli aalajangerneqarsimatinnagu taarsiissutinik akiliinissaq ajornakusoortoq, Hulda Ragnheiður Árnadóttir oqarpoq.
Sapaatit akunnerini qaammatinilu aggersuni Grindavíkimi nunap sajoqqinnissaa innermillu anitseqqittoqarnissaa suli aarlerinartoq, taamaammallu qaqugu illoqarfimmiut angerlaqqissinnaanerat suli nalunartoq, Iceland Review naapertorlugu immikkut ilisimasallit oqarput.