Island: Timmisartuussinerit suliumajunnaartoqarneranit sunnerneqassasut
Keflavikimi aamma Reykjavikkimi timmisartunik aqutsisut marlunngornermi aamma sisamanngornermi suliumajunnaassapput.
Islandimi marlunngornermi aamma sisamanngornermi angalasut timmisartunik aqutsisut suliumajunnaarnerannit eqqugaasussanngorput. Timmisartunik aqutsisut akissarsiatik naammaginagit nalunaaqutaq 04.00-10.00 suliumajunnaartarniartut, Islandimi nutaarsiassaqartitsiviit allapput.
Timmisartunik aqutsisut timmisartuussinerit amerlanerpaat eqqorniarlugit nalunaaquttamik taama aaqqiisimapput. Ilisimatitsissutigineqarpoq upalungaarsuinermi sinerissamilu nakkutilliinermi timmisartuussinerit suliumajunnaarnernit eqqorneqassanngitsut.
Akissarsianut isumaqatigiissutit
Islandimi timmisartunik aqutsisut 152-iupput, akissarsianullu isumaqatigiissutinut atuuttoq 1. oktober atorunnaarpoq, nutaamillu isumaqatiginninniarnerit ilungersunarluinnarsimapput.
Islandimut angallassinerit suliumajunnaarnerit piffissarititaata avataani ingerlanneqartarmata, suliumajunnaarnerit Air Greenlandimit malugineqassanngitsut, Air Greenlandimi attaveqatigiinnermik immikkoortortaqarfimmit ilisimatitsissutigineqarpoq.