Islandimi aningaaseriviit ajornartoorsimasut pilerseqqinneqarput
Islandimi aningaaseriveqarnerup ajornartooqqaqisup iluarsiniarneqarnera aallartinneqarpoq aningaaseriviit danskit aningaasanngorlugit milliardinik marlunnik kisitsisitalinnik ikiorserneqarnerisigut.
Islandimi aningaaseriviit annerit pingasut islandermiut koruuninik 270 milliardinik (danskit koruuninngorlugit 11,25 milliardinik) nunami tassani aningaasarsiornermik ingerlatsisut aningaasaliiffigeqqinnerisigut. Tamaatut iliorneq pivoq naalakkersuisut aningaaserivinni nutaani pingasuni, Islandip aningaaseriviisa annerpaat ajutooreernerisa kingorna pilersinneqartuni, piginneqataassutinik tuniniaanerisigut.
Ritzau taamatut allappoq.
Bankit pingasut tassaasut Glitnir, Landsbanki aamma Kaupthing, annaanniarlugit ukiarmi naalagaaffimmit tiguneqarput taamaaliornermut pissutaavoq Islandi aningaasarsiornikkut ajornartoornermik sakkortuumik eqqugaanerata kingorna aningaasarsiornikkut aningaasannanniapiluttartut aningaasannanniapilunnerisa aamma aningaasanik atorniapilunnerisa kingunerisaannik.
Maannakkut naalakkersuisut, aningaaseriviit nutaat pingasut tassaasut Islandsbanki (siusinnerusukkut Glitnir), New Kaupthing aamma New Landsbanki, aningaasalersuiffigilersinnaanngorpaat, taamatut allassimavoq Aningaasaqarnermut Naalakkersuisoqarfimmit nalunaarusiami.
- Uagut maannakkut isumaqatigiissutigisarput Islandip aningaasaqarniarnerata illorraap tungaanut aallartinnissaanut kiisalu aningaaseriviit siumut saannissaannut suliniarnitsinni alloriarneq pingaaruteqartorujussuuvoq, statsminister Jóhanna Sigurdardóttir tusagassiortunut oqarpoq.
Pilersaarut malillugu naalakkersuisut Islandsbankimi aamma New Kaupthingimi piginneqatigiissutit nakkutigisat aningaaseriviusimasut akiligassaqarfiinut neqeroorutiginiarpaat, tamatumunngalu ilutigitillugu naalagaaffik annikitsumik piginneqatigiissutinik peqaannassaaq.
New Landsbanki oqartussaasunit pigineqarallassaaq, aningaasaqarnermut naalakkersuisoq Steingrimmur Sigfusson oqarpoq, Islandsbanki aamma New Kaupthing tuniniarneqassallutik.
- Tamatuma Islandip naalagaaffiata nalorninartoorsinnaanera killersimaassavaa, tassami naalagaaffik aningaaserivinnik aamma aningaaseriveqarnermik kisiartaalluni ingerlatsisuujunnaassaaq, aningaasaqarnermut naalakkersuisoq Sigfusson oqarpoq. Ilanngullugu oqaatigaa piginneqatigiissutinik aktianik tuniniaaneq septembarip naanerani naammassereersimassasoq, taamaliorsinnaanermullu apeqqutaassaaq nakkutilliisutut oqartussaasut akuersinissaat.
Aningaaserivinnik aningaasaqarniarnikkut aaqqissuussiniarneq aallatippoq Islandip inatsisartuisa, Altingip, EU-mut ilaasortanngornissamik isumaqatigiinniarnissanik aalajangiineranit ullualunnguit qaangiuttullu.