Islandimi innermik anitsisartoq qasukkarpoq

Ullumi pingasunngornermi Islandimi innermik anitsisartoq Grimsvötn qasukkarpoq arsakunillu aniatitsiunnaarsimalluni, taama Islandimi oqartussat nalunaaruteqarput.

Europallu avannaatungaani timmisartuussinissaraluit 1000-t unitsinneqariillartullu timmisartuussisarnerit naliginnartut ingerlaleriartoqqilerput.

- Tassa ajornerpaaq maanna qaangiuppoq. Nunallu ilaa arsakorsuarnik poorneqarsimasoq salillugu aallartissinnaanngorparput, taama Islandimi ministeriuneq Johanna Sigurdardottir nuna arsakumik pooqqasoq Vatnajökullip ungasinngisaaniittoq takornariareerlugulu oqarpoq.

Aamma nunat Islandip sanilerisaaniittut arsakunik aallaavilinnik ajornartorsiutaat qaangiutilersut ministeriunerup unnersiutigai.

Timmisartuussinerli maanna ingerlallualeraluartoq, inuit 1000-it missaaniittut innermik anitsisartup ungasinngisaani najugallit suliassanik ulikkaarput.

- Island pinngortitami ajunaarnersuarmik eqqugaaqqavoq, taamaammat assigiinngitsutigut suliniutinik, soorlu innuttaasunik ikiuinissamik arsakunillu saliinissamik naalakkersuisut ikiuutissapput, tassami inuit nunamik naggorissalersinnaaqqinniassammata, taama Sigurdardottir oqarpoq.

2010-sut inngerluinnarpoq

Grimsvötn arfinginngormat innermik anitsilermat arsakut qummut 20 kilometerinik portutigisumut igeriunneqartarput, tassalu siorna innermik anitsinerup kinguneranik ajornartorsiutaasimasunut assigusunik pisoqarnissaa ernummatigineqarsimalluni.

Siornami timmisartuussinissaraluit 100.000-t unitsiinnarneqartariaqarsimapput. Ilaasussat 8 milliuunit nikeriarsinnaajunnaarsimallutik, tassalu sorsuunnersuup kingorna aatsaat taama timmisartuussisoqanngitsigisimalluni.

Ullumi tysklandip silaannaqarfia arsakunik ajornartorsiorfiuvoq, tamaanimi timmisartuussinissaraluit 700-t unitsiinnarneqartariaqarsimammata.

Grimsvötn tassaavoq Islandimi innermik anitsillattaarnerpaajusoq, 1873-imilu innermik anitsinera sakkortunerpaajusimalluni.