Islandimi innuttaasut 400.000-nngulersut
Islandimi innuttaasut aatsaat 2050-imi 400.000-iunerisa nalunaarsorneqarnissaat 2008-mi nalilerneqarpoq. Missingersuulli tamanna atuutinngilaq. Maanna qeqertami inuiaqatigiinnut qaammatini arfinilinni tulliuttuni tamassuma anguneqarnissaa naatsorsuutigeqarpoq.
Island 1.000-iinnarnik innuttaasoqarneruleruni inuttaasut 400.000-it nalunaarsorneqassapput. Tamanna sukkanerujussuarmik pivoq, Kalaallit Nunaannilu innuttaasut amerliartornerisa tamanna angujuminaatsippaat, ataatsimummi innuttaasut allamiunit amerlanerusunit amerliartortinneqarmata.
Islandimi tusagassaqartitsivik Morgunblaðið paasissutissiivoq 2008-mi missingersuinerit kukkuneqartut.
- Ukiumut 0,6 procentimik amerliartornerit innuttaasut amerlassusissaannik naatsorsuinerit takutippaat (2008-mi, aaqq.), tamannali allaasoq paasinarsivoq, Islandip universitetiani School of School of Samfundsvidenskabimi dekani, professor Stefán Hrafn Jónsson, Morgunblaðið-imut oqarpoq.
200.000-inik amerlanerusut
Naatsorsuinerit naapertorlugit ukiuni 40-ni tulliuttuni innuttaasut 200.000-inik amerlanerulersinnaapput.
-Islandip naatsorsueqqissaartarfianit naatsorsuinerit kingulliit naatsorsuutigaat, 2067-ip missaani 600.000-inik innuttaasoqassasugut, professori oqarpoq, missingersuinerillu taamaattut nalorninartoqarneri oqaatigalugu.
Inuttaasut amerlassusissaannik naatsorsuinerit inunngortartut, toqusartut nuttartullu aallaavigaat. Oqaluttuarisaanermi ineriartornerit, soorlu sorsunnerit nappaatillu tuniluussortut ineriartornermut taassumunnga sunniuteqarsinnaapput.
Ilisimatitsissutigineqarportaaq 80-it sinnerlugit ukiullit ukiuni 50-ini tulliuttuni pingasoriaatinngorsinnaasut, tamannalu - Kalaallit Nunaat assigalugu, atugarissaarneq qaffasitsiinnarneqassappat ukioqqortusiartornerit inuiaqatigiinni aningaasaqarnermut ajornartorsiortitsisinnaapput.
Nunatsinni innuttaasut
Nunatsinni innuttaasut annikitsuinnarmik amerliartorput, nunasiartortut allamut nunasiartortunit amerlanerummata. 2018-ip naalernerani inuttaasut 55.992-iupput. Ukiut tallimat qaangiummata innuttaasut 617-inik amerleriarput 56.609-iullutillu, Naatsorsueqqissaartarfiup naatsorsuinerani kingullermi takuneqarsinnaavoq.