Islandimik isumaqatigiissut pillugu Danmarkimit isummat nutaat: Kalaallit Nunaannuinnaq attuumassuteqarpoq

Naalakkersuisut Siulittaasuata Múte B. Egedep (IA) Islandimik suleqateqarnissamik isumaqatigiissut sapaatip-akunnerani kingullermi atsiorpaa.

Suleqatigiinnermi ilaatigut nunat taakku marluk killilersugaanngitsumik niueqatigiissinnaaneranni periarfissat misissorneqassapput.

Islandimik isumaqatigiissut

Isumaqatigiissummi Naalakkersuisut siulittaasuata Islandimilu ministeriunerup siunissami suleqatigiinnermi ukkatarineqartussat neriorsoqatigiissutigaat.

Ukkatarineqassapput:

• Niuernikkut isumaqatigiissummik naapertuulluartumik angusaqarniarlutik illugiillutik Kalaallit Nunaat Islandilu aporfiusut periarfissaasullu misissornissaanut suliaqarnissaq.
• Aamma aalisarnermut atatillugu isumaqatigiissusiortoqarsinnaanersoq misissorneqassaaq.
• Aningaasaqarnikkut suleqatigiinnerunissaq.
• Silap pissusaata allanngoriartornera uumasullu assigiinngisitaarnerat.
• Naligiissitaaneq.
• Ilinniartitaaneq ilisimatusarnerlu.
• Kulturikkut suleqatigiinneq.

Kalaallit Nunaata, Savalimmiut Islandillu 2017-imi isumaqatigiissutaat Danmarkimi naalakkersuisunit atortussaatinneqarsimanngilaq, taamanikkullu tamanna naalagaaffeqatigiinnermi ajornartorsiortitsileraluarsimalluni.

Sermitsiaq.AG-mit sapaatip-akunnerani kingullermi Múte B. Egedemut apeqqutigineqarmat, tamanna 2017-imisulli ajornartorsiutaalersinnaannginnersoq, imatut akivoq:

- Isumaqarpunga tamatuma ernumassutigineqarnissaa piffissaajaatigineqassanngitsoq, tamannami Kalaallit Nunaata Islandillu isumaqatigiissutigaat, aamma Kalaallit Nunaat nunanut allanut tunngasutigut politikkimi sunniuteqarnerusariaqarpoq, Múte B. Egede oqarsimavoq.

Nunanut allanut ministeriaqarfimmit maanna Sermitsiaq.AG-mut ilisimatitsissutigineqarpoq, isumaqatigiissut pillugu ministeriaqarfik siumoortumik paasitinneqarsimasoq:

- Atuagassarititaasut iluiniittoq

- Nunanut allanut ministeriaqarfimmiit uppernarsarneqarpoq, Naalakkersuisut Islandimik politikkikkut suleqateqarnissamik isumaqatigiissut atsiortinnagu Nunanut allanut ministeriaqarfimmut ilisimatitsissuteqarsimasut.

- Islandip suleqatiginerulernissaanik politikkikkutisumaqatigiissut Kalaallit Nunaannuinnaq attuumassuteqarpoq, susassaqarfinnullu angerlaanneqarsimasunuinnaq tunngassuteqarlutik, taamalu Namminersorneq pillugu Inatsimmi atugassarititaasut iluiniilluni Kalaallit Nunaata nammineerluni Islandimut isumaqatiginninniarlunilu isumaqatigiissuteqarsinnaanera, Nunanut allanut ministeriaqarfimmit allakkatigut akissummi allassimavoq.