annaassiniarneq
Islandimiut angallataata qimaasut 318-it Akullersuarmi annaappai
Islandimiut angallataata qimaasut 300-t sinnillit, nunanit assigiinngitsunit 13-ineersut, annaappai. Annaassiniarnerup kingorna qimaasut Siciliamukaanneqarput
Arfininngormat unnukkut inuit 381-it missaanniittut, Afrikamit Akullersuaq ikaarlugu umiatsiamik Europamukartut, islandimiut angallataannit sinerissamik nakkutilliisumit annaanneqarput.
Islandimiut umiarsuaat EU-p Akullersuarmi annaassiniarnerani, Triton-imi, peqataavoq qimaasorpassuillu Siciliami illoqarfimmut umiarsualiveqarfimmut Pozzallo-mut oqqunneqarput.
Annaanneqartut 318-it ilagaat meeqqat 14-it arnallu naartusut tallimat, taakkualu napparsimmavimmut unitsinneqarput.
Nunanit assigiinngitsunit 13-init
Nunasiartortut nunanit assigiinngitsunit 13-ineersuupput: Sudan, Ghana, Marokko, Mali, Mauretanien, Senegal, Pakistan, Nigeria, Syria, Eritrea, Indis, Tunesia kiisalu palæstinameersut.
Qimaasut akornanniipput tunesiamiut arfineq-pingasut, taakkualu politiinit pasineqarput inunnik anngiortumik eqqussuisartutut, qimaasunillu pineqartunik angallassisutut.
Kangiani Qiterlermi Afrikallu avannaani - pingaartumik Libyenimi - aaqqiagiinnginnerpassuit pissutigalugit inuit Europaliarniat amerleriarujussuarsimapput.
Qimaasut amerleriarujussuartut
Nunasiniat unioqqutitsillutik EU-mut iserniartut 2014-imi pisortatigoortumik 276.000-iupput, tassa ukiumut siulianut sanilliullugit pingasoriaammik amerleriarsimallutik. Taakkunannga 220.000-t Akullersuaq ikaarlugu Europamut pisimapput.
Naalagaaffiit Peqatigiit naatsorsuutigaat siorna inuit ikinnerpaamik 3500-t Akullersuaq ikaarlugu Europaliarniartut ajunaarsimasut. Taamaasilluni nunasiniartunut Akullersuaq ikaassallugu nunarsuarmi ulorianarnersaavoq.
EU-mi nunat killinginik nakkutilliinermik ataqatigiissaarisuuvoq Frontex, EU-p killeqarfinnut nakkutilliisoqarfia.