Islandimiut oqaasii navianartorsioriartorput
Islandimi atuartut namminneq oqaatsiminni oqaatsit nalunngisaat ikiliartorput, Islandimilu pisortat tamanna ernumanartoqartippaat, maannalu 3.klassimiit 10.klassip tungaanut atuartunut immikkut suliniuteqarniarput.
Inuusuttut akornanni atuakkanik atuarnissamut soqutiginninneq qaffasippallaanngilaq, Islandimi Ilinniartitaanermut Kulturimullu aningaasaateqarfimmi immikkoortortaqarfimmi pisortaq, Freyja Birgisdóttir naliliivoq, Islandimi tusagassaqartitsivik Morgunblað naapertorlugu.
- Piffissaq unammiinnalerparput, amerlanerpaallu sunngiffimminni atuakkanik atuarnissaminniit allanik sammisaqarusunnerusarput, tamannalu arlaleriarluni uteqattaarneqartuareernikuuvoq, ilaatigut Eiríki Rögnvaldssonimit arlameriarluni erseqqissaatigineqarnikuuvoq, Islandimiut oqaatsitsigut nunaarannguartut inissisimasuusoq, Islandermiullu oqaasii atorneerukkiartulersimasut, aviisi naapertorlugu Freyja Birgisdóttir oqarpoq.
Tuluttut oqaatsit atorneqaleraluttuinnaavipput, taanna erseqqissaavoq.
Oqaatsit atorsinnaasat ikiliartortut
- Islandimi atuartut namminneq oqaatsiminnit nalunngisaat ikiliartorput, atuakkanik atuarnikinnerat pissutaalluni, aammalu avatangiisiminni tuluttut oqaatsit nalinginnaasumik atorneqaleraluttuinnarmata. Taamaattumik nunanut allanut oqaatsinik ataatsimoorussinerusunut sanilliutissagutta, meerartatsinnut sanilliullugu taakkua ilitsoqqussaralugu oqaasii avatangiisaanni siammasinnerujussuupput, Freyja Birgisdóttir oqarpoq, taannalu isumaqarpoq, Islandermiut oqaasiisa illersornissaat pillugu immikkut eqqummaarinnerusoqartariaqartoq.
Ernumanerup alliartornera malitsigalugu 3.klassimiit 10.klassip tungaanut atuartut akornanni atuakkaminnik paasinnittarneri pillugit misiliummik nutaamik pilersitsisoqarniarpoq. Misiliutip upernaap ingerlanerani atuutilernissaa naatsorsuutigineqarpoq, taannalu atuartut oqaatsitigut piginnaasaasa qaffasissusaanik erseqqissaaqataassaaq, nukittuffiit sanngiiffiillu ersarissisinniarlugit.