Islandip piratpartia partiip annerpaat pingajuuvoq

Islandip naalakkersuisuini Altingimi isumaqatiginninniarnerit unamminartut arfininngormat qinersisoqareertorlu aallartittussanngorput.

Sapaammi ullaap tungaa qinersinerup inernerinik kisitsisoqareersorlu kikkut amerlanerussuteqarnersut suli paasisarsinngilaq. Kikkut aamma Naalakkersuisooqatigiilissanersut issiavinnilu 63-usuni kikkut issiassanersut suli nalunarpoq.

Namminersulerusullutik Partii qinerneqarnerpaavoq, taakku qinersisut 29 procentiinit taaneqaramik.

Islandip piratpartia taajuunneqarnerpaat pingajuattut inississimanera qinersinermi tupaallannartortaavoq. Taakku 14,5 procentinit qinerneqarput. Naak qinersisoqannginnerani misissuinerni qinerneqarnerussasut ilimagineqaraluartoq. Piratpartip aallarniisua siuttualu Birgitta Jónsdóttir taalliortartutut imminut isigaaq - taalliortartoq politikkeriusoq. Piratpartillu politikkiat tamat oqartussaaqataanerannut qanippoq.

Islandermiut internetsikkut inatsisissanik siunnersuuteqarsinnaalissasut inuiaqatigiinnilu taasititsinerit amerlanerussasut taakku qineqqusaarutaannut ilaapput. Maannami ingerlariaaseq allanngortinneqassasoq taakku siunertarivaat tamannalu qinersisartunit inuusunnerusunit tapersersorneqarpoq.

195.200-t qinersinermi taasiartorsimapput. Taamaasilluni innuttaasut qinersisinnaasut 79,2 procentii taasiartorsimallutik. Oqaluttuarisaanermilu aatsaat taama kisitsit appasitsigalutik. Qinersinermi 2013-mi 81,4 procentit qinersisimapput.

Innuttaasut politikkerertaminnut tatiginninnerat aningaasaqarnermi 2008-mi ajalusoornerup kinguneranit appariaateqarsimavoq.

Islandillu ministererigalua Sigmundur David Gunnlaugsson akileraartarnermut pinerlussimasutut Panamamit pappilissanit paasineqareersorlu Naalakkersuisunut tatiginninneq appariaateqangaatsiarsimavoq.

Tamanna pissutaalluni qinersinissaq ukiup affaa sioqqullugu suaarutigineqarpoq.

/ritzau/