Islandip universitetia nittartakkatigut saassunneqarpoq
Qarasaasiat isumannaatsuunerannik immikkut ilisimasallit tallimanngornermi Reykjavikimi universitetip qarasaasiaanik eqquiniartut saassussinissaat pinngitsoortinniarlugu ulapipput. Russit allap qarasaasiaanut pulasartut pisuunerarneqarput.
Islandimi universitetimi nittartakkap saassunneqarujussuarnerani allat qarasaasiaannut pulasartut russit Akira saassussinermut pisuusorineqarput, eqimattat taakkua ransomware atorlugu universitetip nittartagaani paasissutissat isertuussanngortinniarsarisimavaat tillinniarsarisimallugilluunniit, kingornalu isertuussanngortitat piiarneqarnissaannik akileeqqusillutik.
Sverigemi naalakkersuisut nittartagaannik Akiramit saassussinerit kingulliit ilisimaneqartut pisimapput.
Islandimi tusagassiorfik Visir.is naapertorlugu universitetimi sulisoqarnermut pisortaq oqarpoq allat qarasaasiaannut pulasartut ilinniartut pillugit paasissutissanik annikitsuinnarnik pissarsisimasut. Taamaakkaluartorli ilinniartut ilinniartitsisullu universitetip qarasaasiaanut iserniaraangamik mianersortariaqartut, universitetimit nalunaarutigineqarpoq.
Mianersoritsi
- Ilinniartut sulisullu isissutertik allatigut atorsimagunikku allanngortittariaqarpaat, aamma inuit kajumissaarneqarput allakkat e-mailillu paasissutissanik peqquserluutinik imallit mianersorfigissagaat, sulisoqarnermut immikkoortortaqarfimmit ilisimatitsissutigineqarpoq, naatsorsuutigineqarlunilu ullumi februaarip tallimaanni atuartitsineq nittartakkatigut saassussinermit sunnerneqassanngitsoq.
Pinngortitaleriffik 2023-mi oktobarimi ransomwaremit eqqugaagami ajornartorsiuteqalerpoq, qarasaasiatigut aaqqissuussat tassani eqqugaammata.