Issittoq Københavnimi festivalimi sammineqartoq

Novembarip aallartinnerani Issittoq misigisaqarfigineqarsinnaavoq, tassani Issittoq 4. aamma 5 november Nordatlantens Bryggemi Københavnimi ingerlanneqassaaq.

Festivalimi assigiinngitsuni sammisassat assigiinngiiaarput, tuniniaaviit, saqqummersitsiviit, saqqummiinerit pulaartut Issittumi angalaartittarpai.

Festivalimi pisussat eqqumiitsuliornermi kulturimit oqaluttuarisaanermut aamma politikkimut sammipput, ukioqatigiiaanullu tamanut saaffiginnittuullutik.

Issittoq sammivinnit tamanit

Festivali Issittumut tamatigoortumik takusassaqartitsissaaq. Ilaatigut saqqummiisoqarnerani pulaartut Ruslandip Issittumi soqutigisai paasisaqarfigisinnaavai, tassani orlogskaptajn Johannes Riber Forsvarsakademietimeersoq ilisimasaminik saqqummiissaaq.

Rikke Guldberg Hansenip pinngortitaleriffimmeersup silap pissusiata allanngoriartornerisa arfernut sunniutai nassuiarpai.

Kulturi aamma festivalimut qitiuvoq, eqqumiitsuliortut suliaqartut saqqummersitsivinni arlalinniipput, filmiliortartoq Emile Hertling Péronard ilaavoq, taanna kalaallit filmiliortarneranni maanna ineriartorneq saqqummiuppaa.

Aammattaaq arnat inuit kakiorneri qanga maannakkullu paasisaqarfiginissai periarfissaavoq, Maya Sialuk Jacobsen tassani soqutiginartumik saqqummiivoq.

Minutsini 20-ni kalaallisut

Great Greenland aamma festivalimi peqataavoq, Det Arktiske Husimilu minutsini kalaallisut pikkorissartoqarsinnaavoq.

Arktisk Festival 2023 Nordatlantens Brygge aamma Det Grønlandske Selskabimit, angalatitsivik Arctic Friend, Københavns Universitetimi Kalaallit Nunaat Issittorlu pillugit ilisimatusarfik, Polarbiblioteket, Savalimmiut aallartitaqarfik, Kalaallit Nunaata aallartitaqarfia amma Islandip aallartitaqarfia suleqatigalugit aaqqissuunneqarpoq.

Festivali Visit Greenlandimit aamma Royal Greenlandimit kiisalu kattuffinni Issittumik ukkatarinnittunit tapiiffigineqarpoq.

Festivalimut iserneq akeqanngilaq.