Issittumi aaqqissuussineq nutaaq – Kalaallit Nunaat piareersimava?

Silap pissusiata allanngoriartornera Issittoq aqqusaarlugu umiarsuarnut aqqutinik nutaanik, nunattalu ataani uuliamik aatsitassanillu naleqarluartunik qalluinissamut ammaavoq. Naalagaaffiit nunanilu tamalaani selskabersuit piareersimapput. Silatuumik aalajangiisoqartassaaq Kalaallit Nunaat iluaqutiginiapilunneqassanngippat. Suliniuteqartoqartariaqarpoq, kalaallit namminneq aalajangiinissaminnut pisariaqartunik piginnaaneqalissappata. Aammalu nalorninartuliorusussinnaasariaqarpoq qunusuissuseqarlunilu piumasaqaateqarnissamut piffissamullu sivisuumut eqqarsarnissanut. Apeqqutaavoq: Kalaallit Nunaat piareersimava?

Sermeq aappat Kalaallit Nunaat saneqqullugu Amerikalu avannaqq ullugu umiarsuit ingerlaarsinnaalissapput. Sermerlu aappat qaqqani aatsitassat piumaneqartut qallorneqarsinnaalissapput Nunattalu imartaata naqqani uuliamik qillerisoqalersinnaalluni. Silap pissusiata allanngoriartornerata kingunerisaanik pinngortitami sunnertiasumi aatsitassanik annertuumik piiaasoqalissaaq nunarsuarmilu niuerneq tunngaviusumik nikisissallugu. Kalaallit Nunaat nunarsuup isorliunerusuaniit qeqqanut inississaaq.

Nunani tamalaani ingerlatsivissuit Kalaallit Nunaata ataa soqutiginartippaat naalagaaffiillu issittumi sakkutuulersorput alapernaarsuillutillu. Danmarki 2012-mi pingajussaa ilisimatuunik ilisimasassarsiortitsivoq, Qalasersuup qallunaanit pigineqarneranut uppernarsaatissanik katersuiniarluni. Kina Islandimi aallartitaqarfimmini annertuumik iliuuseqarpoq aammalu Japan, Kina, Sydkorea EU-lu Nordisk Rådimi alapernaarsuisutut ilaasortanngornissaminnik qinnuteqarsimapput.

Periarfissarujussuit pisuussuterujussuillu pineqarput, taamaattumillu aamma politikkikkut aningaasarsiornikkullu nukiit nukittuut pineqarlutik. Immikkut ittumik iliuuseqartoqartariaqarpoq Kalaallit Nunaa isumaqatigiissutsiniarnissaminut nunarsuarmiunillu naapitsinissaminut piginnaasaqalissappat. Ilinniagaqartariaqarpugut, ineriartortariaqarpugut, piumasaqaateqartariaqarpugut qunusuittariaqarlutalu. Tamanna iluatsissappat Kalaallit Nunaat nunani tamalaani akuerineqassaaq, inuiaqatigiit ineriartulissapput imminullu tatigilerlutik! Piareersimavugut?