Issittumi immap sikua kingusissukkut issunerpaaffini anguaa
Upernarpoq aasartinnaguli immap sikua 10 million kvadratkilometeri aattariaqarpoq
Marsip 18'iat Issittumi immap sikuata siammarnerpaaffini killippaa. Ukiuni 2004'miit 2012'imut immap sikuata qalligai, 1978'imi uuttortaasarnerit aallartinnerannit ukiut qulingiluat taakku aatsaat taama sikunikitsigaluni.
Issittumi immap sikua marsi aallartittoq siammarnerpaaffissani killikkamiuk 16 million kvadratkilometerisut isorartussuseqarpoq.
- Sikup annertussusaa agguaqatigiissitsinermi marsip arfernganni siaruaannerpaajusarpoq. Ukioq mannali sapaatip akunnerini marlungajanni kingusinnerulluni marsip 18'ianni aatsaat pivoq, siku pillugu ilisimatooq Rasmus Tonboe, DMI, Center for Ocean og Is, oqarpoq.
Marsip 18'iat sikup siammarnerpaaffiatut rekordiliinngilaq. Siorna 2010 immap sikuata siammarnera aatsaat marsip 31'anni pivoq.
Ukioq manna sikup annertunerpaaffissaminut pinerata kingusikkaluartoq, taamaattoq ukiup ingerlanerani sikuniarnera annikikkaluariarluni, 1978'imi satellitsit atorlugit uuttortaasalernerup kingorna siku annertussusaata minnerit qulingiluartaraat. Sumiiffiit sikusimasutut nalunaarutigineqartarput, sumiiffiup 15 procentia sikumit qallerneqaraangat.
- Naak, sikunera januaarip naajartornerani oqaluttuarisaanermi aatsaat taama annikitsigigaluartoq, taamaattoq sikunera ukiut kingulliit qulingiluat sikusarnerannit annertuneruvoq, Rasmus Tonboe oqaluttuarpoq.
Siku pillugu ilisimatuup tikkuarpaa, ukiuni qulingiluani kingullerni, 2004'mit 2012 ilanngullugu, 1978'imi uuttortaanerit aallartinneqarnerisa kingorna aatsaat taama annikitsigisumik sikuniartartoq. - Ukioq manna sikunerata annertunerpaajummat 15,2 million kvadratmeteri qallerpaa.
2011-2012 ukiuunerani Barentsip imartaani Karahavetimilu sikuniarnera aatsaat taama annikitsigaaq. Illuatungaani Davisstrædemi aamma Berringip kangerliumanersuani sikooqaaq. 2012'ip aallartinnerani siku anorimit ajattugaalluni Barentshavimut pisinneqarpoq, tamaani sikuniartarnera suli annikeqaaq.
Issittumi avannarpasissuani sikup siammarnerpaaffini killikkamiuk aalluni aallartippoq. Nordpolip eqqaani siku aatsaat juunimi aakkiartulissaaq.
- Qaammatini tullerni arfinilinni immap sikuata 2/3 aassaaq. Tamatuma saniatigut Issittumi siku saannerulissaaq, Rasmus Tonboe oqarpoq.