Issittumi ingeniørit sulisoriumaneqarluartuusut

- Ilinniartuutivut suliluunniit ilinniakkaminnik naammassinatik suliffissarsereertarnerat takujuarparput, Pernille Erland Jensen oqarpoq. Taanna Sisimiuniittumi Issittumi Sanaartornermut Attaveqarnermullu DTU-p diplomingeniørinngorniarfiani ilinniartitsisuuvoq.

Ingeniørit Kalaallit Nunaanni nunanilu allani pisortat namminersortullu suliffeqarfiini sulisoriumaneqarluartarput.

Issittumi Sanaartorneq Attaveqarnerlu

Issittumi Sanaartornermut Attaveqarnermullu ilinniarfimmi diplomingeniørinngorniarneq Namminersorlutik Oqartussaat suleqatigalugit neqeroorutaavoq, ilinniartullu ilinniagaqarnermikkut sanaartornermi, atortulersuinermi, nukissiuuteqarnermi, illup illuani silaannaqarnermik, miljøteknikkimi issittumilu pissutsinik naleqqussaanissamut pilersaarusiornermi ingeniøritut piginnaasaqalersarput.

Ilinniartitaaneq ukiunik sisamanik sivisussuseqarpoq, tassunga ilanngullugu semesterimi ataatsimi suliffeqarfinni misiliisoqartarluni. Sisimiuniittumi DTU Campusimi ilaatigullu Ballerupimi Lyngbymilu DTU Campusini ilinniartoqartarluni- Aamma nunani allani semesterimik ingerlatsinissaq periarfissaavoq.

DTU-mit issittumut atatillugu suleqatigiissinnaaneq arlalitsigullu ilinniagaqarsinnaaneq neqeroorutigineqartarput:

Issittumi Sanaartornermut Attaveqarnermullu diplomingeniøri

Aalisarnermi teknologimut diplomingeniøri

Issittumi Semesteri

Nordic Master in Cold Climate Engineering

Arctic Mineral Resources

Pissarsiffik: DTU

Sulisoriumaneqarluarneq kisitsisitigut paasissutissani aamma takuneqarsinnaavoq. Taakkunanimi takuneqarsinnaavoq, ilinniakkaminnik naammassinnissimallutik suliffissaaleqisut 2015-imiit 2018-imut ikiliartuaarsimasut. Ilinniakkaminnik naammassinninnerannit ukiup aappaata ingerlanerani suliffissaaleqisut agguaqatigiissillugu 3,2 procentimik amerlassuseqarsimapput. Teknikkikkut illiniartitaanermi bachelorinngorsimasut allat 5,9 procentii suliffissaaleqisimallutik.

Inissialiortitsineq annertuserujussuarsimasoq

Pernille Erland Jensen naapertorlugu, issittumi ingeniøritut piginnaasaqartunik sulisoqarusussusermut pissutaavoq, Kalaallit Nunaanni inissialiortiternerup annertuserujussuarsimanera nutaanillu attaveqaasersuinerit, tamatumunngali pissutaaneruvoq Kalaallit Nunaanni ingeniørit amigaataanerat.

- Malunnarluinnarpoq, kulturit assigiinngitsut akimorlugit suleqateqarsinnaanermik, aaqqissuussinermi unammillernarsinnaasunik isumaginnissinnaanermik aamma ataqatigiittunik assigiinngitsunik misissueqqissaarsinnaanermik nalimmassaasinnaanermillu ilinniagaqarnermi piginnaasaqarlualersimasut sulisoriumaneqarnerat, taanna erseqqissaavoq.

Ukiunik 20-nngortorsiorneq

Ingeniøritut ilinniartitaaneq Kalaallit Nunaannit Danmarkimillu pilerigineqarluartuuvoq – 2020-mi ilinniartut nutaat 15-it aallartipput, taakkunannga qulit Kalaallit Nunaanneersuullutik sinnerilu Danmarkimeersuullutik. Ataatsimut isigalugit ilinniartussatut akuerisaasut 55 procentii Kalaallit Nunaanneersuusarput, 45 procentiilu Danmarkimeersuusarlutik.

Ilinniartitaaneq aamma inunnit ilinniarnertuutut soraarummeersimanngitsunit pilerigineqartarpoq. Taamatuttaaq suliffeqarsimagaanni diplomingeniøritut ilinniartoqarsinnaavoq.

- Issittumi Sanaartornermut Attaveqarnermullu ilinniartut arlallit inuussutissarsiutinik ilinniagaqarsimasuupput, assersuutigalugu sanasutut, imaluunniit ilinniagaqaratik ukiualunni suliffeqarnermik misilittagaqartuusarput, ilinniarfimmut qinnuteqarniarlutik ukiumi ataatsimi pikkorissarsimasut, ilinniarfimmit oqaatigineqarpoq.

Issittumi Sanaartornermut Attaveqarnermullu diplomingeniørinngorniarfik septembarip qaammataani ukiunik 20-nngortorsiussaaq. Taamanikkussami inuit 150-it missaanniittut ilinniakkaminnik naammassinnissimasussaapput.