Issittumi Piginnaasanik annertusaanissaq: Kalaallit Nunaat peqataatinnagu Kalaallit Nunaat eqqartorneqassanngilaq
Kalaallit Nunaanni illersornissamut tunngatillugu suliassat naammassineqarnissaat, inuiaqatigiinnullu iluaqutaanissaat qulakkeerniarlugit Kalaallit Nunaat sunniuteqaqataassaaq, IA sinnerlugu Folketingimut ilaasortaq Aaja Chemnitz oqarpoq.
Oqariartaaseq ”Kalaallit Nunaat peqataatinnagu Kalaallit Nunaat eqqartorneqassanngilaq” IA-p ilassuteqarfigaa ”Kalaallit Nunaat peqataatinnagu Kalaallit Nunaanniittoqassanngilaq”-mik, tassa suliffeqarfiit oqartussallu nunatsinniittut, inuiaqatigiinnut iluaqutaaqqullugit, suliassani pingaartumik illersornissamut tunngasuni peqataanerulersikkumallugit.
Aviisi AG taama allappoq.
Inuit Ataqatigiit illersornissamut tunngatillugu isumaqatiginninniarnermi marloqiusamik atuineq, tassa sakkutooqarfittut innuttaasunillu atuisinnaaneq qitiutillugu ersarissunik piumasaqaateqarniarpoq. IA-p illersornissamut tunngatillugu isumaqatiginninniutissaani tamanna allassimavoq. Illersornissamut tunngatillugu isumaqatigiissummi ukiuni qulini tullerni 143 milliardit koruunit aningaasaliissutiginiarneqarput. Taakkunani ilaavoq Issittumi Piginnaasanik annertusaanissaq, tassunga 1,5 milliardit koruunit illikartinneqarsimallutik.
Inuiaqatigiit pisariaqartitaat
IA sinnerlugu Folketingimut ilaasortap, Aaja Chemnitzip, illersornissamut ministeri akulikitsumik ataatsimeeqatigisarpaa, Kalaallit Nunaanni illersornissap iluani, nunatsinnilu suliffeqarfiit sulisuisa suliani peqataatinneqarnissaannut IA-p kissaataanut tunngatillugu tunngavilersuisarluni.
Sammisami IA-p kissaataanik ersarissaalluni, illersornissamut ministeri Troels Lund Poulsen marlunngornermi oktobarip 10-ani kingullermik ataatsimeeqatigaa. Illersornissaqarfiup Kalaallit Nunaanni aningaasaliineranut tunngatillugu marloqiusamik atuinerup pingaaruteqassusaa – tassa sakkutooqarfinnut inuiaqatigiinnullu ineriartortitsisinnaanera isumaqassusaalu kingullermik erseqqissarpai.
Aviisimi AG-mi atuarnerusinnaavutit. Aviisi uani pissarsiariuk:
